78-Канн кинофестивали ғолиблари эълон қилинди. Variety нашрининг ёзишича, фестивалнинг бош мукофоти эронлик режиссёр Жафар Панаҳининг “Оддий тасодиф” номли фильмига топширилди.
Жафар Панаҳи бир неча марта қамоқ жазосини ўтаганидан ва Эронни тарк этиш ҳуқуқидан 20 йилга маҳрум этилганидан сўнг, илк бор фестивалда иштирок этишга муяссар бўлди.
The Hollywood Reporter хабар беришича, режиссёр “Оддий тасодиф” фильмини яширин тарзда суратга олган ва бу лойиҳага уни айнан қамоқхонада ўтказган йиллари ва тажрибалари илҳомлантирган. Фильм қурбонлар ва жаллодлар ўртасидаги муносабатлар ҳақида ҳикоя қилади. Сюжетга кўра, озодликка чиққан мухолиф фикрдаги шахс уни бир вақтлар қамоқда қийнаган одамлардан бирини учратдим, деб ўйлайди. Аввалига у қасос олишни режалаштиради, бироқ кейинчалик шубҳаланиб, ўзига савол беради: адолат истаётган одам учун зўравонликка жавобан зўравонлик қилиш тўғрими?
Фото: IMDb
Жорий йилда “Олтин палма япроғи” учун 22 та фильм кураш олиб борди. Номзодлар орасида Ричард Линклейтернинг “Янги тўлқин”, Ари Астернинг “Эддингтон”, ҳамда Уэс Андерсоннинг “Финикия схемаси” каби фильмлари ҳам бор эди.
Ғолиблар рўйхати:
- Олтин палма япроғи — “Оддий тасодиф”, Жафар Панаҳи
- Гран-при — “Ҳассос қадрият”, Ёаким Триер (Дания)
- Ҳайъат аъзолари мукофоти — «Сират», Оливер Лаше ва “Қулаш овози”, Маша Шилински
- Ҳайъатнинг махсус мукофоти — «Тирилиш», Би Ган
- Энг яхши режиссёр — “Махфий агент”, Клебер Мендонса Филҳо
- Энг яхши актриса — “Сингил”, Надия Меллити
- Энг яхши актёр — “Махфий агент”, Вагнер Моура
- Энг яхши сценарий — “Ёш оналар”, Жан-Пьер ва Люк Дарден
- «Олтин камера» мукофоти — “Президент торти”, Ҳасан Ҳади
- FIPRESCI (Халқаро кино танқидчилари федерацияси) мукофоти — “Махфий агент”, Клебер Мендонса Филё
Изоҳ (0)