Кинотавсия: севги ўлимдан ҳам қудратли туйғу эканини исботловчи корейс дорамалари

Жанубий Кореянинг мазкур сериалларида нафақат севги, балки ўлим устидан ҳам ғалаба қозонганлар ҳақида ҳикоя қилинади.

“Кумихо афсонаси”

Тўққиз думли тулки гўзал ва қудратли — у инсонлар дунёсида бемалол яшаб, барча имкониятлардан баҳраманд бўлиши мумкин. Бироқ Ли Ёнг бунинг ўрнига одамларга зарар етказаётган ҳамжинсларини излаб топиб, назорат қилиш билан шуғулланади. Уни севги ҳаракатлантиради. Аммо бу инсониятга эмас, балки бир неча аср олдин йўқотган қизига бўлган муҳаббатидир. Иши эвазига унинг севгилиси қайта туғилиши мумкин. Бироқ Ли Ёнг қачон ва қаерда эканлигини билмайди.

Бир куни у севгилисига икки томчи сувдек ўхшаш Нам Жи Ани учратади, лекин барча белгиларга кўра айнан у эмас.

Агар Ли Ёнгнинг кумихонинг эътибори ва муҳаббатига ташна рашкчи укаси бўлмаганда, воқеалар бундай қизиқарли тус олмасди. Ли Ран ўзбошимча, мақсадларига эришиш учун ҳеч нарсадан тап тортмайди, акасидан нафратланади ва унга ҳар томонлама халақит беришга уринади.

“19-ҳаётимда учрашамиз”

Бан Жи Им ғайриоддий қобилиятга эга — у ўтмишини эслай олади. Унинг охирги ҳаётидан аввалги умри қисқа бўлган, аммо айнан ўшанда у Мун Со Ха билан учрашган. Жи Им бу ҳаётда Со Хани кўриш, у билан суҳбатлашиш, ёнида бўлиш учун барча имкониятлардан фойдаланган.

Бироқ Бан Жи Имнинг биринчи ҳаёти фожиали бўлган, аммо қиз буни мутлақо эслай олмайди. Хўш, ким қизни ўтмиш ҳаётларини эслашга, севимлиларининг йўқолишини қайта-қайта бошдан кечиришга маҳкум этган ва бу лаънатдан қандай қутулиш мумкин? 

“Менинг жиним”

Жин 300 йилдан бери инсонлар орасида яшаб, битимлар тузиб, умуман олганда энг яхши ҳаётини кечирмоқда. То у бадавлат оиладан чиққан То До Ҳи исмли қизни учратмагунча шундай давом этади. Қизга Жиннинг кучи мужассам бўлган татуировка ўтиб қолади. Бу тақдир тақозосими ёки бахтсиз тасодифми?

“Ккок Ду мавсуми”

Ўлим фариштаси ҳар 99 йилда бир марта ерга келиб, қисқа умр кечиради ва яна ғойиб бўлади. Унинг кучи ва қудратига кўпчилик ҳавас қилади, чунки у учун имконсиз нарса йўқ. Уни ҳеч ким жиловлай олмайди. Ккок Ду ғайриоддий ўлимга маҳкум аёлни учратмагунча шундай эди. Бу аёлнинг сўзи унинг учун қонунга айланади. Ўлим фариштаси шифокор қизнинг барча буйруқларини бажаради, бунинг сабабини ўзи ҳам тушунмайди, ахир илгари ҳеч қачон бундай ҳолат юз бермаганди.