Оиласи ҳақида гапиришни истамайди, Мустафога ўхшатишларини ёқтирмайди: турк актёри Меҳмет Гунсур ҳақида қизиқарли маълумотлар

Меҳмет Гунсур Туркия ва Италиядаги энг машҳур актёрлардан биридир. “Муҳташам юз йил” сериалидаги шаҳзода Мустафо роли унга жаҳон миқёсида шуҳрат келтирди.

Меҳмет Гунсур 1975 йил 8 майда Истанбулда туғилган. Унинг ота-онаси кино ва шоу-бизнес оламидан узоқ эди. Актёрнинг онаси Сибел ўқитувчи, отаси Теоман эса квант физик бўлган. Меҳмет оилада иккинчи фарзанд — унинг Зейнеп исмли опаси бор (у балетмейстер бўлиб ишлайди).

Меҳмет ёшлигидан камералар ва бошқаларнинг эътиборини яхши кўрарди. Етти ёшида Гунсур модел сифатида дебют қилади. У кўплаб реклама роликларида иштирок этган, ҳатто Mavi Jeans брендининг расмий юзи бўлган. Меҳмет жуда банд бўлишига қарамай, ўқишни ҳам унутмайди. У мактаб таълимини Туркияда олади, кейин Италияга йўл олади. У ерда O‘zel İtalyan Lisesi хусусий коллежига ўқишга киради, сўнгра ватанига қайтиб келиб, бир неча йил ўтгач, Мармара университетини (журналистика факультети) муваффақиятли тамомлайди. Бу вақт давомида Гунсур турли хил кастингларда фаол қатнашган ва шу билан бирга курер, бармен ва модел сифатида ишлаган. Аммо у доимо кино оламини орзу қилган.

Ижодий карьераси

Меҳмет фильмдаги дебютини 1989 йилда қилган. Кейин у “Баҳорда гуллаган мимоза” мини-сериалида кичик роль ўйнайди. Бироқ фильм унчалик машҳур бўлмайди ва Гунсур 7 йил давомида кино ҳақида унутишга мажбур бўлади. 1996 йилда “Турк ҳаммоми” фильмида роль ўйнайди. Аммо туркиялик продюсерлар ёш актёрни янги лойиҳаларга таклиф қилишга шошилмайди. Шунинг учун ҳам Меҳмет Италияда омадини синаб кўришга қарор қилади.

2000 йилда у “Дон Маттео” телесериалида, бир йил ўтиб эса яна иккита фильмда роль ўйнайди. 2005 йилгача актёр кичик ёрдамчи роллар билан кифояланган. Кейин унга “Пахта даласи маликаси” турк сериалида роль берилади. Меҳметнинг ўсиб бораётган маҳоратини томошабинлар ҳам, танқидчилар ҳам пайқашади. У тез-тез янги лойиҳаларга таклиф қилина бошлайди. 2011 йилгача Гунсур “Кўзингни юмсанг”, “Тўй ва бошқа офатлар”, “Овоз” фильмларида суратга тушган.

2011 йилда ҳаммаси ўзгаради. Меҳмет Гунсур дастлаб “Севги тасодифларни ёқтиради” фильмида, кейин “Биз 20 ёшда бўлган Сайгон” фильмида роль ўйнади ва ниҳоят “Муҳташам юз йил” фильмида шаҳзода Мустафо ролини ижро этади. Айнан шу сериал унга дунё миқёсида шуҳрат келтиради.

Актёрнинг кейинги фаолияти, айниқса Туркияда муваффақиятли ривожлана бошлайди. У “Унутсам, пичирла”, “Алвон Истанбул”, “Фи, Чи, Пи”, “Чағалайлар ҳукмдори”, “Канага”, “Совға”, “Қўшалоқ бахт”, “Отатурк 1881—1919”, “Квест” каби фильм ва сериалларда суратга тушган.

2024 йилнинг ёзида Меҳмет Гунсур янги турк биографик сериали “Анқара менинг онам”да бош ролни ўйнаши маълум бўлди. Унинг шериги Бергузар Корел бўлади.

Сўнгги бир неча йилдирки, Меҳмет икки давлатда яшайди. Турк актёри ҳам турк, ҳам италян фильмларида суратга тушиш учун мунтазам равишда янги таклифлар олади. Сўнгги йилларда у янги шартномалар имзолашга шошмаяпти. Гунсур сценарийни ўқиётганда ўзини дарҳол қаҳрамон ўрнига қўя олсагина,  суратга тушишга рози бўлади.

Меҳмет Гунсур “Муҳташам юз йил”да

Гунсур иккинчи мавсумда машҳур сериалнинг актёрлар жамоасига қўшилади. У Моҳидаврон ва султон Сулаймоннинг ўғли — шаҳзода Мустафо ролини ўйнайди. Туғилганданоқ бола вақти келганда тахтга ўтиришини эшитган ва билган. Бироқ Хуррамнинг ҳарамда пайдо бўлиши ҳамма нарсани ўзгартиради.

Мустафо отасининг янги хотинини ўзи ва онасига таҳдид сифатида қабул қилади. Бундан ташқари, у болалигиданоқ Моҳидавроннинг кўз ёшларини кўрган, у славян аёлнинг айби билан тўкилган. Мустафо дастлаб отаси Сулаймон билан илиқ ва ишончли муносабатда эди. Ўғли улғайиб, Хуррамнинг султонга таъсири кучайгани сари муносабати янада ёмонлашади. Натижада душманларнинг қатор фитналари ва ҳийлалари туфайли Сулаймон Мустафони қатл қилади.

Гунсурнинг айтишича, унинг бутун фаолияти давомида энг қийин бўлган кадр — қаҳрамони қатл қилинган саҳна бўлган. У бир неча кун давомида суратга олинган. Меҳметга оламшумул машҳурлик келтирган Мустафо роли бўлишига қарамай, у буни узоқ вақт унга берилган тавқи лаънат деб ҳисоблайди. Кўп йиллар давомида актёр фақат шаҳзода сифатида қабул қилинган. Бу унинг карьерасини ривожлантиришга тўсқинлик қилади, чунки у ҳақиқатан ҳам биргина образнинг гарови бўлишни хоҳламайди. Бироқ йиллар ўтиб, турк юлдузи серқирра актёр эканлигини амалда исботлашни афзал кўради.

Шахсий ҳаёти

49 ёшли актёр 18 йилдан бери бахтли турмуш кечирмоқда. Катерина Монжио — 2006 йилда турк юлдузининг қалбини забт этган машҳур италян режиссёри. 

Рафиқам режиссёр. У тўлиқ метражли фильм режиссёри бўлиб, мен эса ўша фильм премьерасига келган меҳмонлардан бири эдим. Биз шундай танишганмиз. Севги биринчи сониядан эмас, танишганимиздан ярим соат ўтгандан кейин бошланган, дейди Меҳмет.

Эр-хотин бахтли турмуш қурган ва учта фарзанди бор — қизлари Майа, Хлое ва ўғли Али. Катерина ва Меҳмет шахсий ҳаётларини бошқалардан эҳтиёткорлик билан яширишади. Улар камдан кам ҳолларда биргаликда суратларни ижтимоий тармоқларга жойлаштиради, ҳеч қачон фарзандларининг суратларини кўрсатишмайди. Гунсур бир неча бор журналистларни қонуний чоралар кўриши билан қўрқитиб, суратларини ўчиришга мажбурлаган.

Турк актёри ҳам хотини каби бахт сукунатни яхши кўришига амин ва уларнинг машҳурлиги болаларига таъсир қилмаслиги керак, деб ҳисоблайди.

Меҳмет Гунсур ҳозирда

Ҳозирда Меҳмет Гунсур фильмларда роль ўйнашда давом этмоқда. Шунингдек, у тез-тез машҳур реклама брендларининг моделига айланади. Турк актёри бўш вақтини рафиқаси ва болалари билан ўтказишни афзал кўради. Интервьюда у ота бўлгандан кейин унинг масъулияти сезиларли даражада ошганини айтади.

Меҳмет ҳам ўқишни ва очиқ ҳавода сайр қилишни яхши кўради. Актёр анчадан бери севимли машғулотлари — теннис ва чанғи спортидан воз кеча олмайди.

Гунсур ўзини бахтли инсон деб билади, чунки унинг орзу қилган оиласи ва севимли касби бор.