Замонавий мусиқа оламининг энг машҳур ва зиддиятларга бой намоёндаларидан бири сифатида тан олинган Канье Уэст ўзи ҳақида “In Who’s name?” номли ҳужжатли фильмни суратга олди. Бу ҳақда “Правила жизни” нашри хабар бермоқда. Мазкур фильм 2025 йилда намойиш этилиши режалаштирилган.
Манбаларга кўра, умумий бюджети 1 миллиард долларга тушган лойиҳа рэпернинг ҳаёти давомида аввал нашр этилмаган архив кадрлардан иборат. Биографик фильм устида Канье Уэст билан бирга 18 ёшли режиссёр Николас Баллестерос ишлаган. Унда рэпернинг ҳаёти бутунлай ўзгариб кетишига нималар сабаб бўлгани ҳам ёритилади (Уэст 2021 йилда ўз исмини расман Йе исмига деб ўзгартирган). Фильм ҳақидаги промо-ролик 7 ноябрь куни эълон қилинади.
Variety нашрининг қайд этишича, фильмда қандай қилиб Канье Америка тарихидаги энг бадавлат қора танли одамга айлангани ҳақида ҳикоя қилинади. Шу билан бирга, супер юлдуз нега озодлик йўлида эришган барча нарсасини хавф остига қўйгани, корпоратив эксплуатация, ирқий ажратишлар ва Америка орзусига хос бўлган психологик муаммоларга дуч келгани ёритилади. Фильмда Ким Кардашьян, Жулиа Фокс ва Йенинг фарзандлари ҳам иштирок этиши кутилмоқда.
Фильмни халқаро дистрибуция қилиш ҳуқуқи Utopia ва Goodfellas компанияларига берилган. Утопиа компаниясининг вице президенти Мари Зенитер мазкур лойиҳа кенг жамоатчилик ўртасида катта қизиқиш уйғотишига ишонч билдирди. Унинг сўзларига кўра, фильм томошабинга маълум бир фикрни тарғиб этмайди, балки хулоса қилишни уларнинг ўзларига қўйиб беради.
“In Who’s name?” биографик фильми Канье Уэст ҳақидаги биринчи ҳужжатли фильм эмас. 2022 йилда Netflix платформасида “Jeen-yuhs: Канье трилогияси” номли уч қисмли фильм чиққан. Лойиҳа оператори ва режиссёри рэпернинг узоқ йиллик дўсти Куди бўлган.
Изоҳ (0)