Истеъдодли актриса ва хонанда Алия Бҳатт карьераси шиддат билан ривожланиб бораётган актрисалардан биридир. У аллақачон миллионлаб мухлислар томонидан эътироф этилган ва Болливуднинг бошқа юлдузларининг олқишларига сазовор бўлган.
Актрисанинг болалиги ва кинога илк қадам
Бўлажак Болливуд актрисаси 1993 йил 15 март Мумбайда Маҳеш Бҳатт ва Сони Разданнинг оиласида дунёга келган. Алия ўсмирлик йилларини Араб денгизи соҳилидаги шаҳарда ўтказди. Болалигида тўладан келгани учун уни яқинлари Алу (картошка) деб чақиришган. Қизнинг келажаги ҳаётининг илк кунлариданоқ олдиндан белгилаб қўйилган эди, чунки у кино олами билан яқиндан фаолият юритадиган оилада туғилиш бахтига муяссар бўлганди.
Бҳатт ота-онасининг ҳар иккиси ҳам кино саноатининг машҳур вакилларидан бўлган. Алия ва унинг синглиси Шаҳин ижодий муҳитда улғайган. Уларнинг отаси Маҳеш Бҳатт режиссёр, продюсер ва сценарий муаллифидир. Унинг меҳнати ортида элликдан ортиқ фильмлар мавжуд. Маҳеш Бҳатт ҳатто Ҳиндистондаги энг нуфузли Миллий кино мукофотига ҳам сазовор бўлган.
Алиянинг онаси Сони Раздан актриса бўлган. Унинг Шаҳин исмли синглисидан ташқари ўгай акаси Раҳул ва синглиси Пужа ҳам бор. Улар Маҳеш Бҳаттнинг Лорен Брайт билан биринчи никоҳида туғилган. Режиссёр актриса Сони Разданни севиб қолганидан сўнг Ислом динини қабул қилган ва шу тариқа биринчи никоҳидан ажралмай, яна бир марта уйланган.
Жажжи Алия 6 ёшлигида “Жиноий роман” фильмида дебют қилди, унда бош қаҳрамонлар сифатида таниқли актёрлардан Акшай Кумар ва Прити Зинта иштирок этди. Алия Прити Зинтанинг синглиси сифатида кўриниш берган.
Алия Бомбей шаҳридаги Жамнабаи Нарси мактабини тамомлагандан сўнг, қайси касбни танлаш ҳақида узоқ ўйлаб ўтирмади: унинг тақдири кино билан боғлиқ эди.
Алия Бҳатт иштирокидаги фильмлар
2012 йилда “Йил талабаси” фильмининг премераси бўлиб ўтди. Фильм учун актриса 16 килограмм вазн ташлашига тўғри келди. Аввалига у бош рол учун ўзини жуда ҳам ёш деб ҳисоблагани сабабли кастингдан ўтишига шубҳа билан қараган. Боз устига, Алия суратга олиш жараёнлари сабаб 12-синфни тугата олмаган.
Унинг ижроси турли муҳокамаларга сабаб бўлган. Баъзи танқидчилар уни Карина Капурнинг дебюти билан солиштирган. Аммо айнан шу лойиҳа орқали режиссёр Каран Жоҳар ва бош ролларни ижро этган актёрлар Ҳиндистонда танила бошлади. Дўстлик ва севги ҳақидаги комедияли мелодрама хитга айланиб, кино кассаларида 12 миллион доллар ишлаб топди, бу кўрсаткич ўша вақтдаги ҳинд киноси катта ютуқ эди.
Орадан икки йил ўтгач, Алия Бҳаттнинг фильмографиясига Имтиаз Алининг “Шоссе” фильми қўшилди. Лойиҳа 64-Берлин кинофестивалида тақдим этилди. Қизиғи шундаки, сценарий суратга олиш бошланишидан олдин тугалланмаган эди. Режиссёр ҳикояга импровизация муҳитини берган ва фильм якуни съёмка жараёнида ўйлаб топилган. Алиянинг ушбу фильмдаги ижроси иккита мукофот: “Stardust” ва “Фильмфаре”га сазовор бўлди.
Четан Бҳагатнинг романи асосида ишланган “Икки штат” мелодрамасидаги роли учун актриса тамил тилини ўрганиши керак бўлган. Алия Бҳатт таниқли ҳамкасби Аржун Капур билан бирга ишлаган. Танқидчилар актрисанинг навбатдаги ижросини ҳам юқори баҳоладилар.
“Ҳампти Шарманинг келини” номли романтик комедияси муваффақияти бўйича ўзидан аввалги иккита лойиҳадан ўзиб кетди. Унда Алия тўйига бир ҳафта қолганда нотаниш йигитни севиб қолган панжоблик Кавя исмли қиз ролини ижро этган. Мазкур рол унга “Энг яхши аёл роли” номинациясида Stardust мукофотини олиб келган. Шунингдек, фильм катта касса тушумларига ҳам эга бўлган.
2014 йил охирида Бҳатт Шаҳид Капур билан бирга “Тунлари уйқусиз” мелодрамасида суратга тушди. Фильм прокатда муваффақиятсизликка учради. Танқидчиларнинг фикрига кўра, кинодаги қаҳрамонлар ўртасидаги туйғулар ишонарли кўринмаган.
Аммо “Учаётган Панжоб” триллери ҳинд киноси тарихида хитга айланди. Шунга қарамай, Алия Бҳаттнинг муваффақият унга қимматга тушди: актриса фильм бюджети тақчиллиги туфайли жуда кичик гонорар олишга рози бўлган эди. Лойиҳа унга ажойиб ижроси учун “Фильмфаре” ва “Зее Cине Wиннерс” маросимидаги энг мукофотини тақдим этди.
2018 йилда Бҳатт 2008 йилда суратга олинган “Жосус аёл” триллерининг ремейкида суратга тушиш орқали мухлислари қувонтирди. Фильм реал воқеаларга асосланган бўлиб, маълумот берувчи агент бўлиш учун покистонлик амалдорга турмушга чиққан жосус аёл ҳикоясига асосланган. Блокбастер актрисага яна бир карра “Фильмфаре” мукофотини олиб келди ва машҳурликнинг янги чўққиларига олиб чиқди. Лойиҳанинг касса тушумлари эса актриса илгари иштирок этган барча фильмларни ортда қолдирди.
Шунингдек, Алия ўзининг кўпқиррали санъаткор эканини исботлаш мақсадида фильмларда саундтрекларни ҳам ижро эта бошлади. Алиянинг “Сооҳа Сааҳа” қўшиғи бунга яққол далилдир. Ҳозирда Алия Бҳатт энг катта маош оладиган Болливуд юлдузларидан. Унинг гонорари 720 минг доллардан 960 минг долларгача етади.
2019 йилда актрис Абхишек Варманнинг “Пайғамбар” романтик мелодрамасида иштирок этди, ушбу фильм Болливуд юлдузларидан Мадҳури Дикшит, Сонакши Синха ва Варун Дхаванни суратга олиш майдончасида бирлаштирди.
2022 йил қишда бўлиб ўтган 72-Берлин кинофестивалида актриса бош ижросидаги “Гангубай Катавади” биографик фильми намойиш этилди. Унда кино соҳасида ишлашни орзу қилган бош қаҳрамон бутунлай бошқа дунёга тушиб қолади ва ўз танасини сотишга мажбур бўлади. Шу орқали у кинода маълум бир мақомга эришади, аммо охир-оқибат йўлдан адашган аёл бу ишларини ташлайди ва унга ўхшаб алданганларга ва етимларга ёрдам беришга қарор қилади.
Шахсий ҳаёт
Актриса ўзининг қисқа бўйи ва доим ёш кўриниши билан ажралиб туради. 160 см баландликка эга Алия Бҳаттнинг вазни 54 килограммдан ошмайди. Бунинг учун у ёга ва кардио машқларини бажаришга одатланган.
Алия машинани ҳайдашни яхши кўради ва унинг энг севимли дам олиш шакли — узоқ вақт ухлаш. Актриса 12 соат давомида тўхтовсиз ухлаши мумкин.
2017 йилда Алия Бҳатт Болливуднинг ёрқин юлдузи Ранбир Капур билан ишқий муносабатлари ҳақида хабарлар тарқала бошлади. Жуфтлик 2018 йилда унаштирилган эди, аммо орадан бир йил ўтгач, Бҳатт ва Капурнинг ришталарига путур етди. Ранбир ва унинг онаси Алиянинг кино карьерасидан воз кечиб, уй Бекаси бўлишини истайди, аммо актриса бундай қила олмайди.
2021 йилда уларнинг тўйи ҳақидаги янги хабарлар актрисанинг мухлисларини қувонтирди. Узоқ кутилган тўй 2022 йилнинг баҳорида бўлиб ўтди. Тез орада юлдуз ҳомиладорлигини эълон қилди ва ноябрь ойида Рахи исмли қиз фарзандли бўлди.
Бугунги кунда Алия Бҳатт
Актрисанинг кундалик тартиби ва иш жадвали бир йил аввал белгилаб қўйилган. Ҳозирда Бҳаттга режиссёрлар томонидан мунтазам равишда янги лойиҳалар таклифи келиб тушмоқда. Унинг карьераси эса жадал ривожланиб бормоқда.
2023 йилда Алия ўзининг кино саноатига кириб келиши муносабати билан 10 йиллик юбилейини нишонлади. Унинг карьера ва оиласига бағишланган интервьюси Фемина нашрида чоп этилди. Фильмлардаги қизиқарли роллардан ташқари, Бҳатт бошқа соҳаларда ҳам ютуқларга эришган: у Gucci брендининг амбассадори ҳисобланади.
Шунингдек, афсонавий Мет Гала қизил гиламига ҳам таклиф этилган камёб машҳурлардан ҳисобланади. Алия мода соҳасида ҳам фаол бўлиб, ўзининг “Эд-а-Мамма” номли кийим брендига эга. Ушбу бренд экологик тоза кийим ишлаб чиқаришга ихтисослашган
Изоҳ (0)