27 июнь куни “Калмар ўйини” сериалининг учинчи мавсуми намойиш этилди. Томошабинлар лойиҳа ниҳоясига етганига ҳануз ишонмаяпти ва сериал давомига оид турли маълумотларни интернетдан изламоқда. Бу орада режиссёр ва сценарий муаллифи Хван Дон Хёк ўз лойиҳаси билан хайрлашганини маълум қилди.
“Иккинчи ва учинчи мавсум учун сюжет ҳикояларини ишлаб чиқаётганимда нафақат ўйинга якун ясайдиган, балки Ги Хун ҳикоясини ҳам тўлиқ тугатадиган ечим топиш зарурлигини англадим. Унинг бу машаққатли йўли асосий ғояни аниқ ифодаловчи тарзда якунланиши муҳим эди”, деди у Netflix билан суҳбатда.
Режиссёр сўзларига кўра, сериалнинг бош ғояси — инсонларни осонлик ва тезлик билан даромад орттиришга интилиш ўрнига ҳамкорликка ундашдир. Фақат шундагина жамиятда ёруғ келажак учун имконият бўлади.
Дон Хёк финал унга бир вақтнинг ўзида ҳам қувонч, ҳам ғам улашганини тан олди. У “Калмар ўйини”ни суратга олиш жараёнида яқиндан ишлаган бутун жамоа билан хайрлашаётганидан афсусда эканини яширмади.
Бироқ мухлислар учун ҳали ҳам умид бор. Аввалига режиссёр биринчи фаслдан кейин давоми бўлмаслигини таъкидлаган эди, аммо яна икки фасл суратга олинди.
Бундан ташқари, Хван спин-офф, яъни алоҳида воқеаларни ёритадиган сериал устида ишлашга қарши эмаслигини ҳам очиқ айтган. У ҳатто асосий мавсумлар воқеалари орасидаги вақт оралиғини белгилаб, янги сюжет айнан шу даврда содир бўлиши мумкинлигини билдирган.
Изоҳ (0)