What’s on Netflix нашрининг хабар беришича, Жанубий Кореяга тегишли “Калмар ўйини” сериалининг америкача версияси 2027 йил декабрь ойида Лос Анжелесда суратга олинади.
Мазкур лойиҳа бир неча йилдан бери ишлаб чиқилаётган бўлса-да, Netflix ҳанузгача бу ҳақда расмий баёнот бермаган ва ҳатто унинг мавжудлигини тасдиқламаган.
Лойиҳа тафсилотлари ҳозирча жуда кам. Дастлабки маълумотларга кўра, янги сериал асл воқеаларнинг ремейки эмас, балки давоми бўлади. Сценарий устида “Утопия” сериали билан танилган Дэннис Келли ишламоқда.
Жорий йил июнь бошида таниқли инсайдер DanielRPK янги сериал номи ўзгариши ва “Калмар ўйини” номидан воз кечилиши мумкинлиги ҳақида хабар берган эди. Шунга қарамай, кўплаб манбалар ҳозирча лойиҳанинг ишчи номи сифатида “Калмар ўйини: Америка” деб юритилаётганини билдирган.
Сериал режиссёри сифатида “Оскар” мукофоти совриндори Девид Финчер тасдиқланган. У Netflix билан кўп йиллик ҳамкорлик шартномасига эга. Лойиҳа продюсерлари Зеус Замани ва Ретт Жиллз бўлади.
Аввалроқ оригинал сериал муаллифи Хван Дон Хёк “Калмар ўйини” лойиҳасининг спин-оффи бўйича янги ғояси борлигини маълум қилган эди. Унга кўра, спин-офф версияда сериал қаҳрамонларининг биринчи ва иккинчи мавсум воқеалари оралиғидаги ҳаёти ҳақида ҳикоя қилинади.
Изоҳ (0)