Сирдарёда 6,7 килодан ортиқ заргарлик буюмларини чегарадан яширинча олиб ўтмоқчи бўлган аёл ва унинг невараси қўлга тушди. Бу ҳақда Божхона қўмитаси матбуот хизмати хабар берди.
“Малик” чегара ўтказиш пункти орқали ҳаракатланаётган фуқаролардан бири холислар иштирокида шахсий кўрикдан ўтказилганида, ички кийимлари орасидан оёқларининг юқори қисмига 19 дона ўрам яширгани аниқланган.
Мазкур ўрамлар белгиланган тартибда очиб кўрилганида уларнинг ичида 9 турдаги 468 дона қимматбаҳо металлдан ясалган ва бриллиант тошлар билан безатилган заргарлик буюмлари бўлган.
Ушбу шахс заргарлик буюмларини яширинча олиб ўтишда ёнидаги 14 ёшли неварасидан ҳам фойдаланган. Вояга етмаган қиз белгиланган тартибда кўздан кечирилганда, унинг ҳам ички кийимлари орасига 12 дона ўрам яширилгани аниқланган Мазкур ўрамларда эса 8 турдаги 454 дона тақинчоқ бўлган.
Шундай қилиб, божхона назоратидан яширилган жами 922 дона тилладан ясалган бриллиант тошлар ўрнатилган заргарлик буюмларининг умумий оғирлиги 6,7 килодан ошмоқда, умумий қиймати эса 5,6 миллиард сўмни ташкил қилмоқда.
Қонунчиликка кўра, Ўзбекистонда жисмоний шахслар томонидан 65 граммгача оғирликдаги қимматбаҳо металл ва қимматбаҳо тошлардан ясалган заргарлик буюмларини божсиз олиб киришга рухсат этилади.
Изоҳ (0)