Ўзбекистон қонунчилигида 2024 йил 1 ноябрдан бир қатор ўзгариш ва янгиликлар кучга киради. Қуйида ушбу санадан кучга кирадиган асосий ўзгаришлар тақдим этилди.
Табиий газнинг ижтимоий норма миқдори оширилади
Ноябрь ойининг биринчи кунидан табиий газнинг ижтимоий норма миқдори 100 метр кубдан 500 метр кубгача оширилади. Яъни ойлик базавий меъёрлар иситиш мавсуми учун мўлжалланган шкалага ўтади.
Ноябрь, декабрь, январь ва февраль ойларида бир ойлик меъёрлар қуйидаги тартибда бўлади:
- 500 м3 гача — 650 сўм (1 м3 газ учун);
- 501 м3 дан 2500 м3 гача — 1500 сўм;
- 2501 м3 дан 5000 м3 гача — 1950 сўм;
- 5001 м3 дан 10000 м3 гача — 2275 сўм;
- 10001 м3 ва ундан юқори — 2600 сўм.
Хорижда таклиф этилаётган иш ўринлари очиқ эълон қилинади
Президентнинг “Хорижда меҳнат фаолиятини амалга ошириш жараёнларини тартибга солиш бўйича қўшимча чора-тадбирлар тўғрисида”ги қарорига кўра хорижий иш берувчилар томонидан таклиф қилинаётган иш ўринлари ҳақидаги барча маълумотлар Миграция агентлигининг электрон платформаси, ОАВ ва ижтимоий тармоқларда очиқ эълон қилиб борилади.
Бино ва иншоотлар энергия самарадорлиги тоифалари жорий этилади
200 квадрат метрдан ортиқ майдонли бино ва иншоотларнинг энергия самарадорлиги тоифасини аниқлаш учун қуйидаги тоифалар жорий этилади: “А”, “V”, “C”, “Д”, “Э”, “Ф” ва “Г”. Бунда “А” тоифаси энг юқори энергия самарадорлигига эга бино ва иншоотларни, мос равишда “Г” тоифаси – энг паст энергия самарадорлигига эга бўлганларини белгилаш учун қўлланилади.
Аҳоли турмуш фаровонлиги оширилади
Қонунчиликка кўра, “Камбағалликдан фаровонлик сари” дастури қуйидагиларни назарда тутувчи “Камбағал оилалар учун еттита имконият ва масъулият” тамойили асосида амалга оширилади:
- барқарор бандлик ва юқори даромад топишга эришиш;
- таълим олиш ва касб-ҳунар ўрганиш;
- кафолатланган давлат тиббий хизматидан фойдаланиш;
- ижтимоий хизматлардан фойдаланиш;
- яшаш шароитларини яхшилаш;
- давлат томонидан маҳаллалар инфратузилмасини ривожлантириш;
- давлат органлари ходимлари билан тўғридан-тўғри мулоқот қилиш.
Инсон ҳаёти ва соғлиғига юқори хавф солувчи омиллар реестри юритилади
Қонунчиликка кўра, барча учун очиқ ҳолатда юритиладиган Инсон ҳаёти ва соғлиғига юқори хавф солувчи омиллар реестри жорий қилинади.
Тадбиркорларга бериладиган кредит 300 млн сўмгача оширилади
Президент қарорига асосан амалга оширилаётган “Кичик бизнесни узлуксиз қўллаб-қувватлаш” комплекс дастури доирасида кичик тадбиркорлик субъектларига ажратиладиган 100 миллион сўмгача гаровсиз микрокредитларни қайта молиялаштириш ёки улар бўйича кафилликлар тақдим этиш тартибини сақлаб қолган ҳолда тижорат банкларига ва микромолия ташкилотларига ўз ресурслари ҳисобига мазкур микрокредит миқдорини 300 миллион сўмгача оширишга рухсат этилади.
Шунингдек, давлат дастурлари асосида кичик ва ўрта тадбиркорлик субъектларини қўллаб-қувватлашга барча тижорат банклари ва микромолия ташкилотлари жалб қилинади.
Айрим гаровсиз микрокредитлар қайта молиялаштирилади
“Кичик бизнесни узлуксиз қўллаб-қувватлаш” комплекс дастури доирасида 100 миллион сўмгача гаровсиз микрокредитлар, кичик тадбиркорлар рўйхатдан ўтган ва фаолият юритаётган ҳудуд тоифасидан келиб чиққан ҳолда, “Тадбиркорликни ривожлантириш компанияси” АЖ томонидан микрокредит берувчиларга қуйидаги ставкаларда қайта молиялаштирилади:
- 5-тоифа учун — 12,5 фоиз;
- 4-тоифа учун — 13,5 фоиз;
- 3-тоифа учун — 14,5 фоиз;
- 2-тоифа учун — 17,0 фоиз;
- 1-тоифа учун — 18,0 фоиз;
Шунингдек, микрокредитларни қайта молиялаштиришда улар бўйича юзага келадиган кредит таваккалчилигини туманлар (шаҳарлар) тоифасидан келиб чиқиб, компания ва микрокредит берувчилар ўртасида тақсимлаш тизими жорий қилинади.
Тайёр заргарлик буюмларига нисбатан импорт божхона божи камайтирилади
Чет элда ишлаб чиқарилган заргарлик буюмларини, башарти улар бўйича божхона тўловлари амалга оширилганлигини тасдиқловчи ҳужжатлар бўлмаса, сотувга қўйиш ва чакана савдода реализация қилиш ман этилади.
Бунда ушбу тартиб бухгалтерия ҳисоби қонунчилигига мувофиқ 2024 йил 1 сентябргача расмийлаштирилган (кирим қилинган) заргарлик буюмларига нисбатан татбиқ этилмайди.
Изоҳ (0)