«Толибон» ҳаракати Тожикистон фуқаролари учун виза режимини бекор қилди, бу, хусусан, Шерхон Бандар савдо-божхона пунктида юк машиналари ҳайдовчиларига нисбатан татбиқ қилинган, дея хабар берган Asia-Plus.
Хабарга кўра, Тожикистонга ўтган ҳайдовчилардан бири бу ҳақда Asia-Plus нашрига маълум қилган.
Ҳайдовчининг айтишича, Шерхон Бандардаги чегара очиқ ва «Толибон» ҳаракати вакиллари транспортларнинг ҳаракатланиши учун муаммо туғдирмаяпти.
«Толибон» биз учун виза режимини бекор қилди. Аввал Афғонистондан қайтишда, тахминан, 200 АҚШ доллари миқдорида пора беришимизга тўғри келганди. Бундан ташқари Шерхон Бадардан ўтишда 1000 сомони харажат қилардик. Энди бундай эмас. Ҳозир юкни ўтказиш учун 60 сомони пул тўлаяпмиз», — деган ҳайдовчи.
«Толибон» Тожикистондаги Афғонистон элчихонаси тожикистонлик ҳайдовчиларга виза беришни тўхтатганидан кейин мазкур режимни бекор қилди.
Афғонистоннинг Душанбе шаҳрида жойлашган элчихонасидаги манба Asia-Plus нашрига визаларнинг қанча вақт давомида берилмаслиги бўйича изоҳ бермаган.
«Толибон» визаларнинг бекор бўлгани бўйича расмий ахборот тарқатмаган, бироқ ҳаракат аъзолари ижтимоий тармоқларда чегарадаги ўтказиш пунктлари ишлаётгани ҳақида видеороликларни улашган ва мамлакатдан чиқишда муаммолар йўқлигини билдирган.
Тожикистон расмийлари ҳам Шерхон Бандар божхона пунктининг очилганига расмий изоҳ бермаган.
Аммо Asia-Plus нашрига маълумот берган ҳайдовчи божхона назоратидан у ерни «Толибон» вакиллари эгаллаб олганидан кейин, яъни ўн кунча аввал ўтганлигини айтган. Ҳайдовчининг сўзларига кўра, у Афғонистон ҳудуди орқали мамлакатга шакар олиб кирган.
«Биз одатда у ердан мевалар, сабзавотлар, айниқса, сабзи ва шакар олиб ўтардик. Бироқ ҳозир омборхоналар бўшаб қолган. Шунингдек, аввал Афғонистон ҳукуматига тегишли бўлган ҳудудлар, жумладан, Шерхон Бандар орқали ҳам маҳсулотлар олиб ўтиш тақиқланди. Шунга қарамай, Афғонистонга ўтиш муаммоли масала эмас ва бизга Қундуз, Балх ва Кобул шаҳарларига боришимизда ҳеч қандай тўсиқлар йўқ», — деган нашр манбаси.
Қундуз вилоятидаги «Пажхвок» агентлиги мухбири Ажмал Кокар ҳам тожикистонликларнинг Афғонистон ҳудудига кириб-чиқишида муаммолар йўқлигини таъкидлаган.
Эслатиб ўтамиз, 22 июнда «Толибон» аъзолари Шерхон-Бандар блокпостини эгаллаган ва 100 дан ортиқ афғон аскарлари ҳамда фуқаролар Тожикистонга қочиб ўтган. Айни вақтда мазкур ўтиш йўли ҳанузгача «Толибон» назорати остида бўлиб турибди.
Аввал Тожикистон Афғонистондаги сиёсий вазиятга қарамай, мамлакатга электр энергияси етказиб беришда давом этаётгани, Афғонистондан ғарб қўшинлари олиб чиқилгач, Евроиттифоқ мамлакатни барқарорлаштиришда ёрдам таклиф қилмоқчилиги, Туркманистон «Толибон» билан яширинча музокаралар ўтказгани, «Толибон» Тожикистон билан чегарада ўз байроғини ўрнатгани ҳақида хабарлар берилганди.
Изоҳ (0)