Ўзбекистон Республикаси Вазирлар Маҳкамасининг «Ўзбекистон Республикасининг ҳаво бўшлиғида учувчисиз учиш қурилмаларидан санкциясиз фойдаланишда огоҳлантириш чора-тадбирлари тўғрисида» 2014 йил 26 ноябрдаги 322-сонли Қарорига асосан 2015 йилнинг 1 январидан бошлаб Ўзбекистон Республикаси ҳудудига учувчисиз учиш қурилмаларини олиб кириш, сотиш ва улардан фойдаланиш тақиқланган, деб хабар беради Божхона қўмитаси ахборот хизмати.
Мазкур қурилмаларни фақатгина Вазирлар Маҳкамасининг алоҳида қарорларида кўзда тутилган ҳолларда айрим ташкилотлар томонидан олиб кириш, реализация қилиш ва фойдаланишга рухсат берилган.
Шунга қарамай, жисмоний шахслар томонидан бу турдаги қурилмаларни божхона назоратидан яширинча олиб киришга уринишлар кўзга ташланмоқда. Ана шундай ҳолатларнинг навбатдагиси «Урганч» халқаро аэропортида аниқланди.
«Санкт-Петербург-Урганч» йўналиши бўйича парвозини якунлаган фуқаро Б.Ж. божхона назоратидан «яшил» йўлак орқали ўтар экан, унинг безовталаниши божхона ходимларида шубҳа уйғотди.
Унга тегишли қўл юклари назорат-рентген аппарати орқали холислар иштирокида кўздан кечирилганда, юклар орасида божхона ходимларининг оғзаки сўрови пайтида маъулм қилинмаган 1 дона учувчисиз учиш аппарати яширилганлиги фош бўлди.
Ҳозирда мазкур ҳолат юзасидан текширув ҳаракатлари олиб борилмоқда.
Таъкидлаш жоизки, бу «Урганч аэропорти» чегара божхона пости ходимлари томонидан жорий йилда аниқланган учувчисиз учиш аппаратларини олиб ўтиш билан боғлиқ ўнинчи ҳуқуқбузарлик ҳолати ҳисобланади.
Изоҳ (0)