Ўзбекистондан 16 та қадимги ҳайкалчаларни четга олиб кетмоқчи бўлган шахс ушланди 

Тошкент вилоятида маданий бойликларни яширинча олиб чиқишга бўлган уринишга чек қўйилди, деб хабар бермоқда Божхона қўмитаси ахборот хизмати.

Айтилишича, “Маданий бойликларнинг олиб чиқилиши ва олиб кирилиши тўғрисида”ги 678-I-сон қонунига мувофиқ эллик йил муқаддам ва ундан ҳам олдинроқ яратилган маданий бойликларни Ўзбекистондан олиб чиқиш мумкин эмас.

Мамлакатдан қўшни мамлакатга ўтиш учун “Ғишткўприк” чегара божхона постига пиёда ҳолда кириб келган фуқарога тегишли бўлган қўл юклар белгиланган тартибда  божхона кўригидан ўтказилиши натижасида йўловчи божхона декларациясида кўрсатилмаган ва оғзаки сўровда божхона ходимига маълум қилинмаган қиймати 41 миллион сўмлик 16 дона турли шаклдаги ҳайкалчалар борлиги аниқланди.

Маданият вазирлиги Бадиий экспертиза бошқармасининг экспертиза хулосасига кўра 8 дона чиннидан ясалган ҳайкалчалар ўтган асрнинг бошларида яратилган санъат намуналари экани аниқланиб, республика ҳудудидан олиб чиқилиши тақиқланган маданий бойликлар сирасига кириши тасдиқланди.

Ҳозирда мазкур ҳолат юзасидан суриштирув ҳаракатлари давом этмоқда.