Америка Қўшма Штатларида ўтказилаётган Клублар ўртасидаги Жаҳон чемпионати мусобақасининг 1/8 финал босқичида Саудия Арабистонининг “Ал-Ҳилол” клуби Англиянинг “Манчестер Сити” жамоасини мағлуб этиб, чорак финал йўлланмасини қўлга киритди. Ушбу тарихий натижадан сўнг футболчилар ва мураббийлар штабига берилган мукофот миқдори кенг муҳокамага сабаб бўлди. Бу ҳақда Onefootball нашри хабар берди.
Саудия Арабистонидаги “Asharq Al-Awsat” нашри журналисти Аҳмад ал-Қарни маълумотига кўра, ҳар бир футболчи 2 миллион Саудия риёли (тахминан 533 минг евро) миқдорида мукофот олган.
Умумий ҳисобда 26 нафар футболчи ва 6 нафар техник ходимни инобатга олган ҳолда, берилган жами мукофот суммаси 64 миллион Саудия риёлни ташкил этган. Бу тахминан 17 миллион еврога тенг.
“Ал-Ҳилол” клубининг ушбу ғалабаси ортидан тарқатилган видеолавҳада клуб президенти Фаҳад бин Нофалнинг Орландо шаҳридаги “Camping World” стадионида футболчилар билан учрашгани акс этган. Видеода президентнинг мукофот ҳақида айтган гаплари махсус равишда кесиб ташланган, аммо кейинги лавҳаларда мураббий Симоне Инзаги ва футболчиларнинг қувонч билан уни қучоқлагани кўринади.
Celebrating with El Presidente 😎💙#FIFACWC | Watch free on @daznfootballpic.twitter.com/GY5nFgCqIF
— AlHilal Saudi Club (@Alhilal_EN) July 1, 2025
Эслатиб ўтамиз, “Ал-Ҳилол” жамоаси 5 июль куни чорак финалда Бразилиянинг “Флуминенсе” клубига қарши майдонга тушади. Учрашув соат 06:00 да (Ўзбекистон вақти билан) бошланади.
Мазкур баҳс ғолиби FIFA томонидан ажратиладиган 18,7 миллион евро миқдоридаги мукофотни қўлга киритади ва мусобақа ярим финалига йўл олади.
Изоҳ (0)