Amerika Qo‘shma Shtatlarida o‘tkazilayotgan Klublar o‘rtasidagi Jahon chempionati musobaqasining 1/8 final bosqichida Saudiya Arabistonining “Al-Hilol” klubi Angliyaning “Manchester Siti” jamoasini mag‘lub etib, chorak final yo‘llanmasini qo‘lga kiritdi. Ushbu tarixiy natijadan so‘ng futbolchilar va murabbiylar shtabiga berilgan mukofot miqdori keng muhokamaga sabab bo‘ldi. Bu haqda Onefootball nashri xabar berdi.
Saudiya Arabistonidagi “Asharq Al-Awsat” nashri jurnalisti Ahmad al-Qarni ma’lumotiga ko‘ra, har bir futbolchi 2 million Saudiya riyoli (taxminan 533 ming yevro) miqdorida mukofot olgan.
Umumiy hisobda 26 nafar futbolchi va 6 nafar texnik xodimni inobatga olgan holda, berilgan jami mukofot summasi 64 million Saudiya riyolni tashkil etgan. Bu taxminan 17 million yevroga teng.
“Al-Hilol” klubining ushbu g‘alabasi ortidan tarqatilgan videolavhada klub prezidenti Fahad bin Nofalning Orlando shahridagi “Camping World” stadionida futbolchilar bilan uchrashgani aks etgan. Videoda prezidentning mukofot haqida aytgan gaplari maxsus ravishda kesib tashlangan, ammo keyingi lavhalarda murabbiy Simone Inzagi va futbolchilarning quvonch bilan uni quchoqlagani ko‘rinadi.
Celebrating with El Presidente 😎💙#FIFACWC | Watch free on @daznfootballpic.twitter.com/GY5nFgCqIF
— AlHilal Saudi Club (@Alhilal_EN) July 1, 2025
Eslatib o‘tamiz, “Al-Hilol” jamoasi 5-iyul kuni chorak finalda Braziliyaning “Fluminense” klubiga qarshi maydonga tushadi. Uchrashuv soat 06:00 da (O‘zbekiston vaqti bilan) boshlanadi.
Mazkur bahs g‘olibi FIFA tomonidan ajratiladigan 18,7 million yevro miqdoridagi mukofotni qo‘lga kiritadi va musobaqa yarim finaliga yo‘l oladi.
Izoh (0)