Мадриднинг “Реал” клуби жамоанинг асосий ҳужумчиларидан бири — Винисиус Жуниордан ижтимоий тармоқлардаги ғалати ҳаракатлари бўйича тушунтириш талаб қилди. Сўнгги кунларда футболчининг Instagram саҳифасида бир қатор ўзгаришлар кузатилди: Чемпионлар Лигаси совринлари билан тушган суратлар ўчирилди, шунингдек, профил биографиясидан “Реал Мадрид” футболчиси экани ҳақидаги ёзув ҳам олиб ташланди.
El Chiringuito нашрининг хабар беришича, клуб ушбу ҳолат юзасидан расмий равишда Винисиусдан изоҳ сўраган. Футболчининг вакиллари эса бундай ўзгаришлар саҳифани футболчининг ўзи эмас, балки ижтимоий тармоқлар билан шуғулланувчи махсус агентлик юритиши сабаб юзага келганини билдирган.
Шундан сўнг футболчининг саҳифасидаги суратлар тикланди, бироқ бу воқеа футбол жамоатчилиги орасида катта шов-шувга сабаб бўлди. Бир қатор оммавий ахборот воситалари ва футбол шарҳловчилари бу ҳолатни Винисиуснинг ёзги трансфер ойнасида клубни тарк этиши мумкинлиги билан боғлашмоқда.
Ижтимоий тармоқларда яна бир тахмин билдирилмоқда. Яъни “Реал” Клублар ўртасидаги Жаҳон чемпионатининг 1-тур учрашувида “Ал-Ҳилол” билан 1:1 ҳисобида дуранг ўйнади. Ушбу баҳсда Винисиус энг ёмон ҳаракат қилган футболчилардан бири бўлди. Шундан кейин унга кўплаб танқидлар бўлди. Аммо ҳозирча футболчи нега бундай ҳаракат қилганининг аниқ сабаблари маълум эмас.
Изоҳ (0)