Хитой давлат кемасозлик корпорацияси Шанхайда ХХРнинг океанларни тадқиқ қилиш учун биринчи “ақлли” кема яратди. Бу ҳақда China Daily газетаси хабар қилмоқда.
Кемага Шанхайдаги Тунсзи университети шарафига “Тунсзи” деб ном берилган.
“Бу янги авлод 2000 тоннали экологик тоза, шовқинсиз ва интеллектуал илмий-тадқиқот кемаси бўлиб, уни маҳаллий компаниялар мустақил равишда лойиҳалаштирган ва қурган”, дейди бош конструктор Ли Чженхуан.
Қайд этилишича, электрореактив двигатель билан жиҳозланган кема қирғоқдан масофадан бошқарилиши мумкин. У очиқ денгизларда автоном навигация ва энергия самарадорлигини бошқаришнинг ақлли тизими билан таъминланган. “Тунсзи” музлик ҳудудлардан ташқари деярли барча океан минтақаларида ҳаракатланиши мумкин.
Кеманинг узунлиги 81,5 метр, кенглиги 15 метр, чўкиши эса 6,9 метрни ташкил этади. У 45 кишини, жумладан 30 нафар олимни сиғдира олади ва 15 узелгача (соатига 27 километр) тезликка чиқиши мумкин. Электр кеманинг сузиш масофаси 80 минг денгиз милясини ташкил этади, у автоном тарзда 35 кунгача ишлаши мумкин.
“Тунсзи”дан илмий-тадқиқот ва муҳандислик ишлари учун, шунингдек, Тунсзи университети талабаларининг амалиёт ўташлари учун фойдаланилади.
Изоҳ (0)