Исроил Грета Тунберг ва бошқа таниқли фаоллар бўлган Ғазога йўл олган Италия ёрдам кемасини ушлаб, бортдагиларни ҳибсга олди. Бу ҳақда CNN хабар берди.
Аввалроқ “Озодлик флотилияси коалицияси” Исроил ҳарбийлари Ғазога ёрдам етказишга уринаётган Мадлен кемасига ўтирганини маълум қилганди. Кема экипажи қаторида экофаол Грета Тунберг ва Европарламентнинг франциялик депутати Рима Ҳассан бор.
“Кема Исроил қирғоқларига яқинлашмоқда. Йўловчилар ўз ватанларига қайтарилиши кутилмоқда”, деди Исроил Ташқи ишлар вазирлиги 9 июнь куни.
Вазирлик Мадлен экипажи аъзолари зарғалдоқ рангли қутқарув нимчасини кийиб, ёнма-ён ўтиргани, ва уларга сув ва сендвич берилгани акс этган видеони оммага эълон қилган. “Озодлик флотилияси коалицияси” кема “халқаро ҳудудда ҳужумга учраганини” маълум қилганди.
“Дронлар кемани ўраб олиб, унга оқ бўёққа ўхшаш модда пуркаган. Алоқа тўхтаб қолган. Радио орқали безовта қилувчи товушлар янграмоқда”, дейилган коалиция хабарида.
Исроил Ташқи ишлар вазирлиги томонидан тақдим этилган видеода денгиз флоти ходими кемага “Ғазо қирғоқлари яқинидаги денгиз зонаси ёпилди” деган радиохабар юборгани кўринган.
Қайиқдан жонли эфирга узатилган видеода фаол Ясмин Ақар палубадаги оқ моддани кўрсатиб, унинг кўзларига таъсир қилаётганини айтган. Кема билан алоқа узилганидан сўнг, коалиция бортда Тунберг ва бошқаларнинг олдиндан ёзиб олинган видео хабарларини жойлаштира бошлади.
“Агар бу видеони кўрсангиз, биз Исроилнинг оккупацион кучлари ёки Исроилни қўллаб-қувватловчи кучлар томонидан халқаро сувларда тутиб олинган ва ўғирлаб кетилганмиз”, деди Тунберг ўз видеосида.
Исроил бир неча бор ёрдам қайиғининг Ғазога етиб боришини тўхтатишини маълум қилганди.
“Мен Мадлен кемаси Ғазога етиб бормаслигини таъминлаш бўйича кўрсатма бердим”, деди Исроил мудофаа вазири Исраэл Кац 8 июнь куни.
Изоҳ (0)