Буюк Британия ҳукумати Панамадан келган кемадан 2,4 тонна кокаинни мусодара қилди ва бу операцияни сўнгги йиллардаги энг йирик наркотик мусодараларидан бири деб атади. Бу ҳақда SkyNews хабар берди.
Гиёҳванд моддалар Лондон Гейтвей портида кема контейнерлари остидан аниқланган. Разведка маълумотларига асосланган операция натижасида 37 та йирик контейнер силжитилиб, қиймати 96 миллион фунт стерлинг (132 миллион доллар) бўлган кокаин топилган.
Британия Ички ишлар вазирлиги бу мамлакатда кокаинни мусодара қилиш бўйича олтинчи йирик ҳолат эканини таъкидлаган. Жиноятчиликка қарши кураш миллий агентлигига кўра, Британия Европадаги энг йирик кокаин бозорларидан бири ҳисобланади.
Бу мусодара чегарани ҳимоя қилувчи денгиз кучларининг жиноятчи гуруҳлардан бир қадам олдинда эканини яна бир бор кўрсатмоқда. Жиноятчиларга очиқ хабаримиз бор: биз бундай операцияларни разведка маълумотлари ва халқаро ҳуқуқ-тартибот идоралари билан ҳамкорликда тобора кучайтираяпмиз. Сизнинг ноқонуний фаолиятингизни тўхтатамиз ва йўқ қиламиз, деган Британия Чегара хизмати денгиз бўйича директори Чарли Истоу.
Ҳукумат маълумотларига кўра, 2022—2023 йилларда Англия ва Уэлсда кокаин билан боғлиқ ўлимлар сони 31 фоизга ошган.
Изоҳ (0)