АҚШ президенти Дональд Трамп Россия президенти Владимир Путиннинг Украинадаги можарони ҳал қилиш борасидаги ҳаракатларидан “норози” эканини билдирди. Шу билан бирга, Америка раҳбари жанговар ҳаракатларни тўхтатиш учун келгусида қандай чоралар кўрмоқчи эканини аниқлаштиришни истамаган.
“Мен буни сизга айтмайман. Биз “кичик сюрприз” тайёрламоқчимиз”, деди Трамп Оқ уйдаги кабинети йиғилишида Россияга нисбатан бўлажак ҳаракатлар ҳақида фикр билдирар экан.
“Путин ҳар доим биз билан жуда хушмуомала бўлган, аммо бу бесамар бўлиб чиқди”, дея қўшимча қилди АҚШ президенти.
Таъкидланишича, Трамп Россия ва Украина ўртасидаги можарони ҳал қилиш у ўйлаганидан кўра мураккаб эканини тан олган. У Россияга қарши санкциялар кучайтирилиши мумкинлигини истисно қилмаган, бироқ Конгресснинг янги чекловлар тўғрисидаги қонун лойиҳасини қабул қилиш истиқболи ўзининг қарорига боғлиқ бўлишини таъкидлаган.
АҚШ президенти ушбу қонун лойиҳасини “жуда диққат билан” ўрганаётганини айтган.
“Бу бутунлай менинг ихтиёримда. Улар уни фақат менинг хоҳишим билан қабул қилишади”, дея таъкидлади у.
Жанговар ҳаракатларни иложи борича тезроқ тўхтатиш зарурлиги ҳақида Трамп Путинга 3 июлда бўлиб ўтган сўнгги телефон суҳбати чоғида айтган. Бунга жавобан Путин можарони сиёсий йўл билан ҳал қилишга содиқ эканини, бироқ Россия ўз мақсадларидан воз кечмаслигини таъкидлаган. Кейинроқ Трамп бўлиб ўтган суҳбатдан норози эканини, чунки “ҳеч қандай натижага эриша олмаганини” айтди. Украина президенти Владимир Зеленскийнинг фикрича, Трампда Россия ва Украина ўртасидаги можарога чек қўйиш имконини берувчи “таъсир воситаси” мавжуд.
Изоҳ (0)