Жоан Роулинг томонидан ёзилган “Омон қолган бола” ҳақидаги эртак ёзувчини бир кечада суперюлдузга айлантирди. Унинг асосида суратга олинган фильмлар эса бутун дунё бўйлаб миллионлаб томошабинлар томонидан кўрилган. Ушбу мақолада Роулингнинг 60 ёшга ва Гарри Поттернинг 45 ёшга тўлгани муносабати билан, фильм тугаганидан сўнг (2011 йилдан кейин) ёш актёрлар машҳурлик билан қандай курашгани ва ҳаётда ўз ўрнини қандай топгани ҳақида сўз боради. Даниэль Редклифф Гарри Поттер ролини ижро этган Даниэль Редклифф кўплаб ҳамкасблари каби суратга олиш майдончасида улғайди. У кино саноатига 2001 йилда, “Ҳикматлар тоши” фильми орқали кириб келган эди. Аммо 2011 йилда Поттер фильмларининг суратга олиниши якунлангач, у ёш сеҳргар образидан узоқлашишга қатъий киришди ва ўз актёрлик фаолиятини ноодатий роллар билан бойитди. Шунинг учун Редклиффни “Қора либосли аёл” мистик триллерида, “Акимбо қуроллари” комедик жанговар фильмида ҳамда машҳур “Мўжизакорлар” сериалида кўриш мумкин. 2012 йилда у Михаил Булгаковнинг ҳикоялар тўпламига асосланган “Ёш шифокорнинг қайдномалари” мини-сериалида бош ролни ижро этди. Қизиқ томони шундаки, Даниэль Редклифф рус ёзувчиси Булгаковни ўзининг энг севимли муаллифи деб бир неча бор таъкидлаган. Шунингдек, у театр саҳнасида ҳам ўзини синаб кўрди ва “Эквус” ҳамда “Бизнесда ҳеч нарса қилмасдан қандай муваффақиятга эришиш мумкин” каби спектакллардаги иштироки билан танқидчилар ва томошабинларни ҳайратда қолдирди. Камералар ортида эса Редклифф осон ҳаёт кечирмади — у ўсмирлик чоғидаёқ алкоголизм билан курашишга мажбур бўлган. Бироқ у бу оғир синовларни енгиб ўта олди ва бахтли оилавий ҳаёт қуролди. 2020 йилда Даниэль актриса Эрин Даркга уйланган — улар “Севганларингни ўлдир” фильми суратга олинаётганда танишган. 2023 йилда эса жуфтликнинг ўғли — Аарон дунёга келди. Руперт Гринт Гарри Поттернинг содиқ ва меҳрибон дўсти Рон Уизли роли Руперт Гринтга дунё миқёсида шуҳрат келтирди. Аммо Поттер фильмларидан сўнг актёр фаолиятида танаффус олишга ва омма эътиборидан четда бўлишга қарор қилди. Катта миқдордаги гонорар эвазига у болаликдаги орзусини амалга оширди — музқаймоқ фургони сотиб олиб, кўчаларда юриб, болаларни бепул музқаймоқ билан сийлади. Орадан кўп ўтмай, Гринт яна кинога қайтди ва мустақил фильмларда ўзини синаб кўрди: 2013 йилда у “Хавфли иллюзия” номли фестивал драмаси, 2015 йилда эса “Ой фирибгарлиги” комедиясида рол ўйнади. Сўнгги йилларда у телевизион лойиҳаларда ҳам фаол иштирок этмоқда: масалан, М. Найт Шямаланнинг “Хизматкорлар уйи” қўрқинчли сериали ва Гилермо дел Торонинг “Ноёб буюмлар кабинети” антологиясида. Гринт юлдузликдан йироқ, оддий ҳаёт кечиради. Унинг айтишича, у касбий фаолият билан оилавий ҳаёт ўртасида мувозанат топишга интилади. 2018 йилда Руперт узоқ йиллик севган қизи — актриса Жоржия Грумга уйланган. Икки йил ўтиб, жуфтликнинг қизи туғилди. Унга ноодатий исм қўйилди — Уэнсдей.
Изоҳ (0)