Каталониянинг “Барселона” клуби “Интер”нинг ўнг қанот ҳимоячиси Дензил Дюмфрисни харид қилиш фикридан воз кечди. Бу ҳақда Fichajes нашри хабар бермоқда.
Аввалроқ “кўк-анорранглилар” нидерландиялик ҳимоячини харид қилишга тайёр экани ҳақида хабарлар тарқалган эди. Бироқ футболчининг шартномасидаги 25 миллион евролик банд муддати тугади ва эндиликда харидор клуб “Интер” билан тўғридан-тўғри музокара ўтказиши керак. Италия клуби эса футболчини юқорироқ нархда трансфер қилишни режалаштирмоқда. Айнан шу вазият сабаб “Барселона” трансфердан воз кечишга қарор қилган.
Клуб мураббийи Ҳанси Флик таркибда етарлича футболчи борлиги, айниқса ўнг қанот ҳимоя чизиғида муаммо йўқлигини таъкидлади. Клуб президенти Жоан Лапорта ҳам яқинда берган интервьюсида жамоа ёзги трансферлар ойнасини бошқа футболчи харид қилмаслигини эълон қилди.
29 ёшли Дюмфрис эса “Интер”ни тарк этишга тайёрлигини билдирган ва шу сабаб машҳур агент Хорхе Мендеш билан ҳамкорликни бошлаган эди. Бироқ ҳеч бир клуб 1 августгача амал қилган бандни фаоллаштиришни хоҳламади.
Эслатиб ўтамиз, ёзги трансферлар ойнаси вақтида “Барселона” 3 нафар футболчи — Жоан Гарсия, Руни Баржи ва Маркус Рэшфорд (ижара асосида) билан шартнома имзолади.
Изоҳ (0)