АҚШнинг 35 ёшли фуқароси Александр Тирон етти авиакомпания рейсларида олти йил давомида бепул учгани учун 30 йилгача қамоқ жазосига тортилиши мумкин. Бу ҳақда АҚШ Адлия вазирлиги хабар қилмоқда.
Маълум қилинишича, 5 июнь куни Александр Тирон электрон алоқа воситаларидан фойдаланган ҳолда фирибгарлик ва сохта баҳона билан аэропортнинг хавфсиз ҳудудига ноқонуний киришда айбдор деб топилган. Прокурорларнинг таъкидлашича, Александр авиакомпания ходимлари учун мўлжалланган дастурдан фойдаланиб, 2018-2024 йиллар оралиғида 34 та рейсга тўловсиз чиққан.
Судда тақдим этилган далилларга кўра, Александр авиакомпания ходимлари учун рейсларни брон қилиш тизими орқали ёлғон маълумот берган. У етти хил авиакомпанияда борт кузатувчиси эканлигини ёлғондан даъво қилиб, 30 га яқин сохта нишон рақамлари ва ишга қабул қилиниш саналарини кўрсатган. Расмийларнинг айтишича, у тизимдан ўнлаб марта бепул саёҳат қилиш учун муваффақиятли фойдаланган.
Шунингдек, ҳакамлар ҳайъати Александрнинг ўзини бошқа учта авиакомпаниянинг борт кузатувчиси сифатида кўрсатганини аниқлаган, бу эса фирибгарлик схемасининг кўламини янада кенгайтирган.
Александрга нисбатан ҳукм 25 августда эълон қилиниши кутилмоқда, у 30 йилгача федерал қамоқ жазосига тортилиши мумкин.
Бундан аввал қозоғистонлик эркак қарийб 73 млн доллар жаримага тортилгани хабар қилинганди. Ушбу миқдорни 3700 йилда тўлаши айтилганди
Изоҳ (0)