AQSHning 35 yoshli fuqarosi Aleksandr Tiron yetti aviakompaniya reyslarida olti yil davomida bepul uchgani uchun 30 yilgacha qamoq jazosiga tortilishi mumkin. Bu haqda AQSH Adliya vazirligi xabar qilmoqda.
Ma’lum qilinishicha, 5-iyun kuni Aleksandr Tiron elektron aloqa vositalaridan foydalangan holda firibgarlik va soxta bahona bilan aeroportning xavfsiz hududiga noqonuniy kirishda aybdor deb topilgan. Prokurorlarning ta’kidlashicha, Aleksandr aviakompaniya xodimlari uchun mo‘ljallangan dasturdan foydalanib, 2018-2024 yillar oralig‘ida 34 ta reysga to‘lovsiz chiqqan.
Sudda taqdim etilgan dalillarga ko‘ra, Aleksandr aviakompaniya xodimlari uchun reyslarni bron qilish tizimi orqali yolg‘on ma’lumot bergan. U yetti xil aviakompaniyada bort kuzatuvchisi ekanligini yolg‘ondan da’vo qilib, 30 ga yaqin soxta nishon raqamlari va ishga qabul qilinish sanalarini ko‘rsatgan. Rasmiylarning aytishicha, u tizimdan o‘nlab marta bepul sayohat qilish uchun muvaffaqiyatli foydalangan.
Shuningdek, hakamlar hay’ati Aleksandrning o‘zini boshqa uchta aviakompaniyaning bort kuzatuvchisi sifatida ko‘rsatganini aniqlagan, bu esa firibgarlik sxemasining ko‘lamini yanada kengaytirgan.
Aleksandrga nisbatan hukm 25 avgustda e’lon qilinishi kutilmoqda, u 30 yilgacha federal qamoq jazosiga tortilishi mumkin.
Bundan avval qozog‘istonlik erkak qariyb 73 mln dollar jarimaga tortilgani xabar qilingandi. Ushbu miqdorni 3700 yilda to‘lashi aytilgandi
Izoh (0)