Фарғона вилоятида ноқонуний диний сабоқ бериш ҳолатлари аниқланди, деб хабар бермоқда ДХХ.
Келтирилишича, ДХХнинг вилоят бошқармаси томонидан ҳуқуқни муҳофаза қилувчи идоралар ҳамкорлигида ўтказилган тадбирда диний таълимотдан сабоқ бериш тартибини бузиш ҳолатлари фош этилди.
9 июнь куни Риштон тумани “Юқори Авазбой” МФЙ Иттифоқ кўчасида яшовчи шахс уйида ҳужра шароитида 10 нафар вояга етмаган болага диний сабоқ бериб келаётгани аниқланди. Болаларнинг 4 нафари 2015, 3 нафари 2017 ва 2 нафари 2019 йилда туғилган. Улар Риштон ва Олтиариқ туманларидаги мактаб ўқувчилари.
Маълум бўлишича, май ойи охирида яшаш уйида ҳужра ташкил қилган шахс ўз хизмати эвазига болаларнинг ота-оналаридан 500-600 минг сўмдан ҳақ олиб келган.
Шунингдек, 2025 йил 10 июнь куни ўтказилган тезкор тадбирда эса 1969 йилда туғилган Бағдод туманида яшовчи шахс ўз уйида ҳужра шароитида диний сабоқ бериш билан шуғулланган. У тегишли ваколати бўлмаган ҳолда, ойига 1 млн сўм эвазига 17 нафар болага ноқонуний диний сабоқ берган.
Тошкент шаҳри, Андижон ва Жиззах вилоятларидан келиб ҳужрада таҳсил олаётганларнинг 11 нафари ҳали болалар.
Бундан ташқари, 11 июнь куни Бувайда туманида яшовчи шахс ҳам ноқонуний диний таълим бериб келгани аниқланди. Мазкур шахс уйида Қашқадарё, Наманган вилоятидан бўлган 14 нафар вояга етмаган болага тасдиқланмаган турли диний адабиётлардан фойдаланиб ноқонуний диний сабоқ бериб келаётгани аниқланди.
Ўзбекистонда фарзандини ноқонуний диний таълим олишга жалб этганлик учун маъмурий жавобгарлик белгиланди.
Қонун расмий эълон қилинган кундан эътиборан кучга кирди. Ушбу қонун лойиҳаси 2024 йил 25 июнь куни депутатлар томонидан биринчи ўқишда қабул қилинганди. Олий Мажлис Сенатининг 16 августдаги ялпи мажлисида қонун маъқулланди.
Қонунчилик палатаси спикери ўринбосари Одилжон Тожиев буни айримлар қонунни нотўғри талқин қилаётгани сабаб бола ҳуқуқлари кафолатларини кучайтиришга оид қонун бўйича изоҳ берганди.
“Таълим тўғрисида”ги қонунга кўра, боланинг умумий ўрта, ўрта махсус таълим олишини таъминлаш, унинг интеллектуал, маънавий ва жисмоний ривожланишига шароит яратиш ота-оналар мажбурияти ҳисобланади. Бироқ Одилжон Тожиев ҳозирги кунда болаларнинг ноқонуний диний сабоқ олишига, давлатнинг мажбурий таълим тизими таъсиридан четда қолишига ҳамда уларда бирёқлама дунёқараш ва мутаассиблик кайфияти шаклланишига ота-оналарнинг ўзи сабабчи бўлиб қолаётганини айтганди.
Хусусан, ноқонуний диний таълим бериш асосан ота-оналар ташаббуси билан “ҳужра” шароитида ташкил этилмоқда. Охирги 5 йилда “ҳужра”да диний таълим олган 9 705 нафар бола аниқланган. Аксарият ҳолларда ота-оналар ўз болаларини диний таълим бериш ҳуқуқи бўлмаган ташкилот ёки шахс ихтиёрига бир неча ойга қаровсиз ташлаб кетиши кузатилмоқда. Бу орада бола тўлақонли шахс сифатида ривожланиши учун зарур бўлган муҳитдан узилиб қолмоқда.
Юқоридаги хатти-ҳаракат юридик тилда “болани қонунга хилоф равишда диний таълим олиш жараёнига жалб қилиш”деб баён қилинган. Қисқа қилиб айтганда, ота-она боласини ъҳужраъга топширса, жавобгар бўлади. “Ҳужра”лар фаолияти эса кўп йиллардан бери қонун билан қатъий тақиқланган, деган эди Одилжон Тожиев.
Шунингдек, бу нарса ота-онанинг ўз фарзандига диний сабоқ, таълим-тарбия беришига умуман алоқаси йўқлигини, чунки бу ҳар қандай ота-онанинг ўз фарзандини шахсан ўзи тарбия қилиш бўйича дахлсиз ҳуқуқи ҳисобланишини қайд этиб ўтганди.
Изоҳ (0)