Тошкентда болакай “удлинител”га осилиб, 5-қаватдан ўзини ташлади

Тошкент шаҳар Шайхонтоҳур туманида болакай “удлинител”га осилиб 5-қаватдан ўзини ташлади. Бу ҳақда ИИВ ахборот хизмати хабар берди. 

Унга кўра, Шайхонтоҳур тумани Ибн Сино мавзесидаги кўп қаватли уйларнинг бирида фуқаро 15 нафарга яқин вояга етмаган болага ноқонуний диний таълим бераётгани аниқланган. У болаларни калтаклагани оқибатида 1 нафар бола электр узайтиригич симига осилиб, 5-қаватдан ўзини ташлаган. Болакай жароҳат олиб, кўплаб синиш ва чиқишлар билан шифохонага олиб борилган. 

Ҳолат юзасидан ўтказилган дастлабки суриштирув давомида 1995 йил Қашқадарёда туғилган, ҳеч қандай диний маълумотга эга бўлмаган шахс 1 июль кунидан бошлаб ижарадаги уйида ҳар бир боладан 200 минг сўм эвазига “ҳужра” ташкил қилиб, 4 нафар болага диний сабоқ бераётгани аниқланган. Шунингдек, 14 дона араб тилида ёзилган ва нашриёти номаълум бўлган диний адабиётлар холислар иштирокида ҳужжатлаштирилиб олинган. 

Мазкур шахсга нисбатан Маъмурий жавобгарлик тўғрисидаги кодекснинг 241-моддасига асосан 15 сутка маъмурий қамоқ жазоси тайинланди. Болаларга етказилган жароҳатлар оғирлик даражасини аниқлаш мақсадида судга оид тиббий экспертиза тайинланган.