Тошкент шаҳрининг уч ҳудудида ноқонуний диний таълим бериб келган шахслар қўлга тушди. Бу ҳақда шаҳар Ички ишлар бош бошқармаси ахборот хизмати хабар берди.
Хабарга кўра, февраль ойида профессионал диний маълумотга эга бўлмаган ҳолда ўзбошимчалик билан шахсий диний тушунчаларини бошқаларга пул эвазига сотишни касб қилиб олган қатор фуқароларнинг ноқонуний фаолиятига чек қўйилди. Хусусан, Сергели тумани ИИО ФМБ томонидан “Янги Сергели” маҳалласида жойлашган “Yasin Academy” номли ўқув марказида араб тилини ўргатиш баҳонасида фуқароларга ноқонуний равишда диний таълим бериш ҳолати аниқланди.
Ўқув маркази раҳбари фуқаро А.Н. араб тилини ўқитишга тегишли рухсатга эга бўлмасдан, меҳнат қонунчилигига зид равишда ҳеч қандай шартнома, буйруқларсиз ўзаро оғзаки келишув асосида фуқаролар Н.Ш. ва Ш.И.ни жалб қилиб, 5 нафар вояга етмаган мактаб ўқувчисига ноқонуний диний таълим берган.
Шунингдек, Миробод тумани ИИО ФМБ томонидан фуқаро А.Л. Telegram мессенжерида “Танишларим” номли виртуал гуруҳ ташкил қилиб, ҳеч қандай диний билимга эга бўлмай туриб, 3 нафар фуқарога моддий манфаатдорлик эвазига онлайн тарзда ноқонуний диний таълим бериб келгани аниқланган.
Шайхонтоҳур тумани ИИО ФМБ томонидан “Бўстон” маҳалласида ижарада яшовчи фуқаро К.К. ва унинг турмуш ўртоғи Х.М. яшаш манзилида моддий манфаатдорлик эвазига 4 нафар вояга етмаган шахсга ноқонуний диний таълим бергани аниқланган.
“Виждон эркинлиги ва диний ташкилотлар тўғрисида”ги қонунининг 3-моддасига биноан диний таълим муассасаларидан ташқарида диний таълим фаолияти билан шуғулланиш қонунга хилоф диний фаолият ҳисобланади ҳамда жавобгарликка сабаб бўлади. Шу сабабли тегишли суд идоралари томонидан ушбу шахсларнинг ҳаракатларига ҳуқуқий баҳо берилди ҳамда Маъмурий жавобгарлик тўғрисидаги кодексининг 241-моддасига (диний таълимотдан сабоқ бериш тартибини бузиш) мувофиқ фуқаролар А.Н.га нисбатан базавий ҳисоблаш миқдорининг 10 баробари миқдорида, Ш.И., К.К. ва Х.М.га – 5 баробар, Н.Ш.га – 3 баробар, А.Л.га – 1 баробар миқдорда жарима жазоси тайинланди.
Изоҳ (0)