Хитой қирувчи самолёти Япония ҳарбий-денгиз разведка самолётига тахминан 45 метр масофада учиб келди. Бу ҳақда Япония Мудофаа вазирлигига таяниб, CNN хабар берди.
АҚШнинг Токиодаги элчиси Жорж Гласс бу ҳаракатни “хавфли“ ва “ўйламай қилинган” деб атаган.
“7 июнь куни эрталаб Тинч океанининг халқаро сувлари устида Япониянинг P-3C Orion денгиз кузатув самолёти ва Хитойнинг Шандонг авиаташувчи кемасидан учирилган J-15 реактив қирувчиси ўртасида яқин тўқнашув содир бўлди”, дейилади Япония Мудофаа вазирлиги баёнотида.
Баёнотга кўра, тўқнашув тахминан 40 дақиқа давом этган. Япония денгиз мудофааси кучлари самолёти кузатув миссиясида бўлган. Хитой самолёти Япония техникасидан 45 метр масофада горизонтал йўналишда учиб келган. Хитой ҳарбий самолёти P-3C самолётининг парвоз йўлаги олдида тахминан 900 метр масофани босиб ўтди, деб хабар берилган.
“Япониялик экипаж аъзоларининг ҳаётини хавф остига қўйган Хитой қирувчи самолётининг манёври хавфли бўлди. Филиппин кемаларига тегажоғлик қилиш, ветнамлик балиқчиларга ҳужум қилиш ёки Австралия самолётларига ракеталар отиш бўладими, Пекин фақат ўйламай қилинган тажовузкорликни билади”, деди Гласс Х тармоғида.
Сўнгги бир неча йил ичида Хитой Жанубий Хитой денгизи ва Ҳинд-Тинч океанининг бошқа ҳудудларидаги барча ҳаракатларда айбланган.
Май ойида Сингапурда бўлиб ўтган мудофаа форумида АҚШ мудофаа вазири Пит Хегсет Хитой ўз қўшниларини таъқиб қилиш ва қўрқитишга уриниш намунасини кўрсатаётганини айтганди.
“Биз ҳаммамиз сув тўплари ва кемаларнинг тўқнашуви, денгизга ноқонуний чиқиш ҳолатлари акс этган видео ва суратларни кўрдик. Жанубий Хитой денгизидаги ерларни ноқонуний эгаллаб олиш ва ҳарбийлаштиришга ҳам гувоҳ бўляпмиз. Бу ҳаракатлар қўшниларга ҳурмат йўқлигини кўрсатади ва суверенитетга, навигация ва парвоз эркинлигига қарши чиқади”, деган Хегсет Шангри-Ла мулоқотида.
Изоҳ (0)