“Махтумқули Фироғий” бадиий фильми Лондон шаҳрида бўлиб ўтган халқаро Евросиё ижодий киногилдияси (ECG Film Festival – 2025) фестивалида “Томошабинлар эътирофи” номинациясида ғолиб бўлди.
Мазкур фильм XVIII асрда яшаб ўтган буюк туркман шоири ва мутафаккири Махтумқули Фироғий ҳаёти ва ижодига бағишланган. Кинода шоирнинг миллий уйғонишга интилиши, юртига бўлган муҳаббати ва тинчликпарвар ғоялари акс эттирилган.
Лойиҳа Ўзбекистон Кинематография агентлиги ва “Туркманфильм” киностудиялари ҳамкорлигида амалга оширилди. Режиссёрлар, актёрлар ва ижодий жамоа ҳам Ўзбекистон, ҳам Туркманистон вакилларидан иборат бўлиб, бу фильмнинг маданий мулоқот ва биродарлик рамзи сифатидаги мавқейини янада оширди.
Ҳакамлар ҳайъати ва томошабинлар, фильмдаги юксак тасвирий маҳорат, тарихий воқеликни ифода этувчи декорациялар ҳамда актёрларнинг таъсирчан ижросини алоҳида эътироф этдилар.
Шуни алоҳида таъкидлаш жоизки, “Махтумқули Фироғий” фильми – бу шунчаки бадиий асар эмас, у халқларни бирлаштирувчи, эркинлик, қадр-қиммат ва инсонийликнинг абадий қадриятларини тараннум этувчи маданий кўприкдир.
“Томошабинлар эътирофи” мукофотининг қўлга киритилиши эса Марказий Осиё киноижодкорларининг маҳоратига берилган юксак баҳодир.
Евросиё ижодий гилдияси томонидан ташкил этиладиган кинофестивал ҳар йили 20 дан ортиқ мамлакат киноижодкорларини бирлаштириб, Евросиё киносини тарғиб қилиш учун ўзига хос майдони бўлиб хизмат қилади.
Изоҳ (0)