Каталониянинг “Барселона” клуби Нидерландиянинг “ПСВ” жамоасининг хорватиялик тажрибали футболчиси Иван Перишични трансфер қилишни режалаштирмоқда. Бу ҳақда Bild нашрига таяниб Championat хабар берди.
36 ёшли футболчининг “ПСВ” билан тузган амалдаги шартномаси 2025 йил 30 июнгача амал қилади. Ҳозирча томонлар келишувни узайтириш бўйича расмий музокараларни бошламаган. Агар янги шартнома имзоланмаса, Перишич келаси ёзда эркин агент сифатида “кўк-анорранглилар” сафига қўшилиши мумкин.
“Барселона”нинг янги бош мураббийи Ҳанси-Дитер Флик Иван Перишич билан яқиндан таниш — улар биргаликда “Бавария” сафида фаолият олиб борган. Германиялик мутахассис футболчининг имкониятларини яхши билади ва уни Ламин Ямал учун тажрибали ўринбосар сифатида кўрмоқда. Қайд этилишича, Флик ўтган мавсумда ҳам Перишични жамоага таклиф қилган, бироқ бу трансфер номаълум сабабларга кўра амалга ошмаган.
Маълумот учун, Иван Перишич 2024 йил сентябрь ойида “ПСВ” билан шартнома имзолаган эди. Жорий мавсумда у клуб сафида 39 учрашувда майдонга тушиб, 16 та гол ва 11 та голли узатмага муаллифлик қилган. Transfermarkt портали футболчининг трансфер нархини 1,5 миллион еврога баҳоламоқда.
Изоҳ (0)