Беларусь президенти Александр Лукашенко Минскдаги стадион кираверишида Си Цзиньпин ҳайкалини ўрнатишни таклиф қилди. Бу ҳақда “Пул Первого” Telegram канали хабар берди.
Маълум қилинишича, 7 июнь куни Минскда Миллий стадион очилиши маросими бўлди. Ушбу стадион Хитойдан ажратилган маблағ эвазига қурилган ва лойиҳа тўлиқ Хитой томонидан амалга оширилган.
“Бу стадион шунчаки спорт иншооти эмас, балки Беларусь футболи юксалиши рамзи ва Хитой билан дўстликни мустаҳкамлаш йўлидаги яна бир қадамдир. Ахир бу объект Хитой совғасидир”, дейилади хабарда.
Стадион кираверишида икки футболчи ёнма-ён тургани акс этган ҳайкал ўргатилган бўлиб, у беларуслик ва хитойлик футболчиларни акс эттиради. Лукашенко ҳайкални кўрганида “Бу ерда Си Цзиньпин ҳайкалини ўрнатиш керак” деб айтган.
“Бу ерда дўстим Си Цзиньпинга ҳайкал ўрнатиш керак, чунки унинг шарофати билан хитойликлар ўз маблағлари эвазига Европада камёб бўлган бу ажойиб стадионни қурди”, деган Лукашенко очилиш маросимида сўзлаган нутқида.
Маълум қилинишича, Хитой томони совға сифатида Беларусь халқига халқаро даражадаги бассейн ҳам қуриб, топширган.
Изоҳ (0)