АҚШ президенти Дональд Трамп ва уни президентлик пойгасида фаол қўллаб-қувватлаган миллиардер Илон Маск ўртасидаги зиддият янги босқичга чиқди. Уларнинг ҳар иккиси ўз ижтимоий тармоқлари Truth Social ва Хъда айбловлар ёғдирди.
АҚШ президенти Дональд Трамп ўзи томонидан илгари сурилган солиқ ва давлат харажатларига оид қонунни танқид қилиб келаётган Илон Маскка муносабат билдириб, ундан хафалигини айтди. Оқ уй раҳбари Илон Маск қонун лойиҳасидан жуда яхши хабардорлигини, тадбиркор электромобиллар учун имтиёзлар бекор қилинаётгани сабаб норози бўлаётганини таъкидлади. Бунга жавобан SpaceX ва Tesla каби компаниялар асосчиси АҚШ президентини ёлғончиликда айблади.
Зиддият ошкора жанжалга айланиб кетар экан, Дональд Трамп Илон Маск компаниялари учун давлат субсидияларини бекор қилиш билан таҳдид қилди.
“Бюджетимиздан миллиардлаб долларни тежашнинг энг осон йўли — Илоннинг давлат субсидиялари ва шартномаларини бекор қилишдир. Мен ҳар доим ҳайрон бўлардим, нега Байден буни қилмаган”, деди Оқ уй раҳбари.
Маск эса ўзининг Х тармоғида жавоб қайтариб, “Бу янада қизиқроқ бўляпти. Қани, хурсанд қил мени”, деди.
АҚШ президенти ва унинг собиқ маслаҳатчиси ўртасидаги можаро Илон Маск Оқ уйни тарк этганидан атиги бир ҳафта ўтмай рўй берди. Шу муносабат билан ўтказилган учрашувда Трамп тадбиркорга АҚШ ҳукуматидаги “қисқа, бироқ аҳамиятли” иши учун миннатдорчилик билдирган эди. Шундан сўнг томонлар қайта учрашмади.
Бироқ АҚШ президентининг асосий солиқ имтиёзлари ва харажатлар ҳақидаги қонун лойиҳаси вазиятни ўзгартирди. Илон Маск бу Қўшма Штатлар давлат қарзини ошириб, дефолтга олиб боришини таъкидлади.
6 июнь куни Оқ уйда Германия канцлерини қабул қилган Дональд Трамп унинг бу сўзларига жавоб қайтарди. АҚШ президенти тадбиркор билан муносабатлари бузилганидан афсусда эканини айтиб, “Маскдан қаттиқ хафа бўлганини, унга жуда кўп нарса берганини” қўшимча қилди.
Илон Маскнинг жавоби эса узоқ куттирмади. Тадбиркор сиёсий донор сифатида Трамп сайлов компаниясига 200 миллион доллардан ортиқ маблағ тикканини эслатиб қўйди.
“Мен бўлмаганида Трамп сайловда ютқазган бўларди, демократлар Вакиллар палатасини назорат қилган бўларди, республикачилар эса Сенатда 51–49 натижани қўлга киритган бўларди... Шунақа ношукрлик”, деб ёзди тадбиркор Х тармоғида.
Tesla учун ёмон кун
Можаро бошлангач, усиз ҳам бойкот компаниялари сабаб аҳволи яхши бўлмаган Tesla акциялари қулади. Компания бир кун ичида 150 миллиард доллар қиймат йўқотди.
Компания акциялари Дональд Трамп ҳокимиятга келгач кескин кўтарилган, бироқ сиёсий фаолияти ва баёнотлари сабаб эса яна қулаган эди. Бироқ тадбиркор Оқ уйни, аниқроғи DOGE раҳбари лавозимини тарк этиб, асосий эътиборни ўз бизнесларига қаратиши ҳақида маълум қилгач, яна кўтарилган эди. Аммо можаро электромобиль ишлаб чиқарувчиси учун жиддий зарба бўлди.
У Оқ уйни соғинди
Дональд Трамп Илон Маскнинг танқидларига муносабат билдирар экан, у Оқ уйни соғинганини таъкидлади. Боиси тадбиркор сайлов кaмпаниясида Дональд Трампни қўллаб-қувватларига учун энг яқин ҳамроҳларидан бирига айланган, бу эса унга кўплаб эшикларни очган эди. Қасамёд маросимида президентнинг ортида туриш, Аir Force One (биринчи борт - таҳ.) самолётида у билан бирга саёҳат қилиш, Оқ уйда ишлаш ва тунаш, шунингдек ҳукумат йиғилишларига қатнашиш шулар жумласидан.
“Ростини айтсам, менимча, у бу жойни соғинди. Ташқарига чиқиб, ўзининг гўзал Овал офисда эмаслигини кўриб қолди”, деган Дональд Трамп.
Оқ уй раҳбари, шунингдек, унинг администрациясидан кетган баъзи одамлар “бу жойни шунчалик соғинганидан ҳатто душманлардек бўлиб қолиши”ни қошимча қилди.
Дональд Трамп Маск бизнесларига субсидияларни тўхтатиш билан таҳдид қилгач, Илон Маск оҳангини янада кескинлаштирди. У Дональд Трампга импичмент эълон қилиб, ўрнига Ж.Д Венсни сайлаш ҳақидаги фикрни маъқуллади. Шунингдек АҚШ президентини Эпштейн ишига алоқадорликда айблади.
Можаро илдизи
АҚШ Конгрессининг Бюджет бошқармаси таҳлилича, Илон Маскни норози қилган қонун лойиҳаси триллионлаб доллар солиқ имтиёзларини тақдим этади ва харажатларни камайтиради. Бироқ шу билан бирга 10 йилда 2,4 триллион доллар бюджет танқислигини келтириб чиқаради. Қолаверса, 10,9 миллион одамни тиббий суғуртасиз қолдиради.
Дональд Трамп ва Илон Маск солиқ имтиёзлари, давлат харажатларидан ташқари NASA масаласида ҳам бир фикрга келолмаган. Агентлик раҳбарлигига тадбиркор томонидан кўрсатилган Жаред Исаакман номзоди президентга маъқул келмади. Оқ уй уни демократ деб баҳолади.
“Бу сўзларни ёзган одам қаерда? Уни дублёр билан алмаштиришганмикан?”, деди Илон Маск Дональд Трампнинг президент бўлишдан олдин давлат харажатлари танқид қилинган постларини саҳифасида улашиб.
Воқеа баъзи демократларни хурсанд қилди. Боиси улар Илон Макс Трампдан юз ўгириб, яна демократлар томонига қайтишидан умидвор. Тадбиркор маслаҳатчиларидан бири Маск “вабанк” қилиши мумкинлигини, яъни демократларни қўллаши эҳтимолдан узоқ эмаслигини таъкидлади.
Изоҳ (0)