АҚШ Эрон ўзининг уран захираларини Америка зарбаларидан кейин қаерга кўчирганини билмайди. Бу ҳақда The New York Times хабар бермоқда.
“Эрон ядро дастурининг ҳақиқий ҳолати анча ноаниқ бўлиб чиқди. Юқори лавозимли АҚШ амалдорлари Эроннинг қуролбоп уранга яқин захираларининг тақдири ҳақида маълумотга эга эмасликларини тан олишди”, дейилади мақолада.
Таъкидланишича, Исроил ҳарбийларининг дастлабки таҳлили Фордо уран бойитиш заводига етказилган зарар жиддий эканлигини, бироқ у бутунлай вайрон бўлмаганини кўрсатган. Шу билан бирга, разведка маълумотларидан хабардор бўлган икки нафар исроиллик амалдорнинг айтишича, Эрон сўнгги кунларда объектдан ускуналар ва уранни олиб чиқиб кетганига доир далиллар ҳам мавжуд.
Нашрнинг аниқлаштиришича, АҚШнинг Эрон ядро инфратузилмасига берган зарбалари унинг ривожланишини 2-5 йилга орқага суриши мумкин.
Маълум қилинишича, АҚШ президенти Дональд Трампнинг Эронга эҳтимолий зарбадан икки ҳафта олдин берган баёноти эронликларни ғафлатда қолдиришга уриниш бўлган. Аслида бу баёнотга қадар Трамп аллақачон зарба тайёрлаш ҳақида буйруқ берган, Бу ҳақда маъмуриятдаги оз сонли кишиларгина билишган.
22 июнга ўтар кечаси АҚШ президенти Дональд Трамп АҚШ қуролли кучлари Эрондаги учта ядровий объект — Фордо, Натанз ва Исфаҳонга муваффақиятли ҳужум уюштирганини маълум қилди. У Теҳрон можарони тўхтатишга рози бўлиши кераклигини таъкидлади. 13 июндан бери Исроил Эрон ядро дастурига қарши операция доирасида ҳар куни Эронга зарбалар бермоқда.
Изоҳ (0)