АҚШнинг сайланган президенти Жо Байденнинг маслаҳатчилари Эрон билан ядро келишувини қайта тиклаш ҳақидаги музокараларни бошлади. Бу ҳақда Исроилнинг 21-телеканалига таяниб, «РБК» хабар бермоқда.
Канал маълумотларига кўра, АҚШ расмий шахслари Байден инаугурациясидан бир неча кун аввал Исроилга Теҳрон билан ядро қуроли ишлаб чиқиш борасидаги чекловлар бўйича мулоқот қайта бошлангани ҳақидаги ахборотни етказган.
Қуддус ўз томонидан ядро битимининг кенгайтирилишига эришмоқчи: у битимга Эрон баллистик ракеталар дастурига, шунингдек, Теҳрон томонидан террорчилик фаолиятининг қўллаб-қувватланишига нисбатан чекловларни киритмоқчи.
АҚШ 2015 йилда қабул қилинган Кенг қамровли қўшма ҳаракатлар режасидан 2018 йилда чиққан, у Эрон томонидан бойитилган уран ишлаб чиқарилишига нисбатан чекловларни кўзда тутарди. Шундан сўнг битим мавжуд бўлишдан деярли тўхтади.
Ноябрь охирида Эрон шимолидаги Мозандарон вилоятида Эроннинг «ядро дастури отаси» олим Муҳсин Фахризода ўлдириб кетилди. У ўтирган автомобиль масофадан туриб бошқарилган йирик калибрли қуролдан ўққа тутилди. Теҳроннинг фикрича, ядро соҳаси олимининг ўлимига Исроил алоқадор.
Шундан кейин 2021 йил январида Эрон Фордодаги ядро объектида 20 фоизгача бойитилган уран ишлаб чиқаришни бошлади. АҚШ Давлат департаментида буни «ядровий товламачиликка уриниш» деб атади ва Теҳроннинг ядро дастури охир-оқибат муваффақиятсизликка учрашига ишонч билдирди.
Байден сайловолди кампанияси чоғида Вашингтон Теҳрон билан ядро битими бўйича мулоқотни қайта бошлаши мумкинлиги ҳақида бир неча марта айтиб ўтган. 3 ноябрдаги сайловлардан кейин Америка ОАВлари сайланган президентнинг жамоаси Кенг қамровли қўшма ҳаракатлар режасига қайтиш имкониятини муҳокама қилаётгани ҳақида хабар берганди.
The New York Times газетаси эса 2020 йил ноябрида амалдаги президент Дональд Трамп ўз маслаҳатчилари билан Фордодаги объектга зарба бериш имкониятларини муҳокама қилгани ҳақида ёзганди. Нашр манбаларига кўра, шу тариқа Трамп Байденнинг ядро битимини қайта тиклаш режаларини қийинлаштирмоқчи бўлган.
Изоҳ (0)