Ўзбекистонда 2030 йилгача 1,5 миллион гектарда ўрмонлар барпо этиш, уларни қайта тиклаш режалаштирилмоқда. Бу ҳақда “Ўрмон ва яшил ҳудудларни кўпайтириш, чўлланишга қарши курашиш агентлиги фаолиятини ташкил этиш чора-тадбирлари тўғрисида”ги президент қарорида белгиланди.
Қарорга кўра, ўрмон фонди ресурсларидан самарали фойдаланишнинг асосий мақсадли кўрсаткичлари этиб қуйидагилар белгиланди:
- 2030 йилгача 1,5 миллион гектарда ўрмонлар барпо этиш, уларни қайта тиклаш ҳамда 3,8 минг гектар ўрмон фонди ерларида доривор ва озиқ-овқатбоп ҳамда зиравор ўсимликлар плантацияларини ташкил этиш;
- 2030 йилгача 9,2 минг тонна дарахт ва буталар уруғларини тайёрлаш ҳамда 919 миллион дона ниҳол ва кўчатларни етиштириш;
- 2025–2026 йилларда тоғ ва тоғолди ҳудудлардаги 500 гектарда “терраса” усулида дарахт ва бута кўчатлари экиш.
Ўрмон ва яшил ҳудудларни кўпайтириш, чўлланишга қарши курашиш агентлиги “Ўрмонтехносервис” давлат унитар корхонаси негизида “Ўрмон хўжалигини рақамлаштириш маркази” давлат муассасаси ташкил этилади. Марказ “Ақлли ўрмон хўжалиги” (Смарт форестрй) ахборот платформасининг ягона оператори ҳисобланади.
Ушбу марказ ўрмон ресурсларини бошқариш жараёнларини рақамлаштириш, уларнинг ҳолатини реал вақт режимида мониторинг қилиш, ўрмон хўжалиги соҳаси фаолияти замонавий технологиялар, сунъий интеллект ва интеграциялашган ахборот тизимлари орқали самарали бошқарилишини таъминлаш билан шуғулланади.
Ўрмон хўжалиги агентлиги директори Низомиддин Бакировнинг 2024 йил бошларида берган маълумотларига кўра, Ўзбекистонда сўнгги олти йил давомида ўрмон фонди ерлари 1 миллион гектарга кенгайиб, 11,9 миллион гектарни, яъни республика умумий ер майдонининг 26,4 фоизини ташкил этди.
“Яшил макон” умуммиллий лойиҳаси доирасида республика бўйича 3 миллион тупга яқин дарахтлар ва буталар кўчатлари ҳамда ниҳоллари бепул етказиб берилган, 457 гектар майдонда “яшил боғлар” барпо этилган.
Изоҳ (0)