Батумининг бир тарафи денгиз, бир тарафи тоғлар ва ўрмонлар билан қопланган. Бу ерга ташриф буюриб, нафақат денгиз соҳилида дам олиш, балки экотуризм, гострономик туризм ва этнографик музейларда бўлишингиз ва археологик қазишмаларда иштирок этишингиз мумкин.
2022 йил 21 майдан бошлаб Uzbekistan Airways Тошкент—Батуми—Тошкент халқаро йўналиши бўйича мавсумий парвозларни амалга оширади. Ҳозирда бу йўналишда ҳафтанинг чоршанба ва шанба кунлари самолёт қатнамоқда.
Ушбу шаҳарга туризм мавсуми очилди, 27 майдан Uzbekistan Airways ва Ажария Туризм департаменти ҳамкорлигида ўзбекистонлик журналистлар иштирокида медиатур ташкил этилди.
“Дарё.уз” журналистлари ҳам 1 июнга қадар давом этган ушбу саёҳатда иштирок этди, қуйида ушбу турдан репортаж тайёрлади.
Грузия ҳақида ҳар бир ўзбек кам бўлса-да маълумотга эга. Лекин унинг автоном давлати бўлган Ажария ҳақида жуда оз ва кенг тарқалмаган ўзига хосликлар мавжуд.
Фуникулёр — қия йўналишда, қисқа масофада юк ва йўловчиларни вагонларда ташийдиган тор изли темир йўл. Вагонлари электр двигатель, чиғир ва пўлат арқон воситасида ҳаракатлантирилади.
Ажария ҳақида қисқача
Ажария — Грузия республикаси таркибида 1921 йил 16 июлда ташкил топган. Закавказиянинг жануби-ғарбида, Қора денгиз соҳилида жойлашган. Майдони 3 минг км², аҳолиси — 340 953 кишига яқин. Ажарияда 6 туман, 2 шаҳар, 7 шаҳарча бор. Пойтахти — Батуми шаҳри ва у Ажариянинг туристик шаҳарларидан бири ҳисобланади.
Шаҳар яқинида
- Махинжаури,
- Зелёний Мис (Яшил бурун),
- Сиҳисдзири, Кобулети курортлари жойлашган.
Тоғ тизмалари
Автоном Республикани Туркия билан чегара бўйлаб баланд Шавшет тоғ тизмаси боғлаб туради. Месхети; Арсиян тизмалари Батумини ўтаб туради.
Иқлим
Ажария ҳудудида 500 метргача баландликда иқлим субтропик, тоғларда мўътадил совуқ. Паст текисликда январь ойида ўртача температура 4°, 7°, июлда — 20°, 23°, тоғларда эса январь ойларида — 2°, июлда —16° даража кузатилади.
Об-ҳавоси ёмғирли. Эрталаб қуёш чарақлаб турганига қарамай саноқли дақиқаларда майин ёмғир сизни сийлаши мумкин.
Дарё, ирмоқлар ва кўл
Энг катта дарёси — Чорох бўлиб, Батуми шаҳри яқинида Қора денгизга қуйилади. Бу дарёнинг юқори оқими Туркияда, унинг ирмоғи — Ажарисскали Шарқдан Ғарбга бутун мамлакатни кесиб ўтади.
Чорохи Туркия ҳудудига кирувчи дарё бўлиб, 26 км масофада Грузиянинг Ажарискали дарёси билан бир маромда оқади. Ажойиблиги шундаки уларнинг суви бир бирига қўшилиб кетмайди. Ажарискали дарёсининг номи — сўзма сўз таржима қилинганда “Ажария суви” деган маънони беради.
Шаршара ва кўлга йўналтирувчи маълумотлар тахтачаси
Фото: Илҳом Хурсаналиев
Энг ажабланарлиси шундаки Батумидаги барча миллий боғлар ва қўриқхоналарга ўтиш учун, албатта, дарё ирмоқларидан дор йўллари орқали ўтилиши керак. Боғ ҳудуди жуда тоза, биронта кузатув камераси бўлмаса-да. Ва ҳар километрда йўл кўрсаткичлар ҳисобига йўлингиздан адашмайсиз. Атроф яшил гиламга буркангандай таассурот уйғотади.
Табиий бойликлари
Фойдали қазилмалари: мис ва полиме-талл рудалар, олтингугурт колчедани, ўтга чидамли тупроқлар. Тупроқлари тоғли ҳудудларда унумли ҳисобланса, денгиз атрофидаги тупроқ барҳанлари қизил-минералли экани қайд этилган.
Батумида нефть қайта ишланади, машинасозлик (кемалар, нефть ва чой саноати учун жиҳозлар, трансформатор, электрокар ишлаб чиқарилади), озиқ-овқат (чой, тамаки фабрикалари, цитрус мевалари маҳсулотлари ва бошқалар), енгил (кўн пойабзал ва тикувчилик ишлаб чиқариш бирлашмалари) саноатлари ривожланган.
Техник резина буюмлари, кимё-фармацевтика, кофеин заводлари бор.
Ўрмонлар
Ҳудудининг 50 фоиздан кўпроғи ўрмонлар билан қопланган.
Тоғ ён бағрларида:
- каштан,
- дуб,
- граб,
- арча,
- пихта
денгиз бўйида субтропик ўсимликлар
- палма,
- магнолия
- эвкалипт,
- бамбукк ўсади.
Кинтриши қўриқхонаси бор. Ажарияда тўртта қўриқланадиган ҳудуд мавжуд: “Мтирала”, “Кинтриши” , “Macҳахела” миллий боғи ҳамда Кобулети қўриқхонаси. Бу жойлар қалин ўрмонзорлардан иборат ва субтропик ўсимликларга жуда бой.
Ботаника бўғида алоҳида Атиргуллар майдони яратилган бўлиб, боғ ҳудуди 5-6 сотих жойни эгаллаган. Бу ерда 300 дан ортиқ гул турини кўришингиз мумкин. Асосийси улардан атиргул ҳиди таралиб туради. Боғбоннинг маълумот беришича, гуллар дунёнинг турли бурчакларидан олиб келинган.
Денгиз ва булвар
Қора денгиз бўйидаги Батумидаги тошли пляж узунлиги 7 километрдан ошади — у жанубда аэропортдан шимолда портга қадар чўзилади.
Энг асосийси пляж текин. Бу ерда лежаклар — 5 лари, соябон — 10 лари (1 грузия лари — 4300 сўм). Соҳилда кутилмаган дақиқада майин ёмғир ёғиши мумкин. Ёз ўрталарида денгиз суви илиқ бўлади.
1863 йилда қурилган ва 1882 йилда қайта тошдан реставрация қилинган майоқ ҳали ҳам портда кемаларга йўл кўрсатиб туради. узунлиги 20 метрни ташкил қилган минорага махсус хизматчидан бошқа ҳеч ким киритилмайди. у аввал оқ рангда нур таратган кейинроқ уни қизил рангга алмаштиришган.
Изоҳ (0)