Ижтимоий тармоқларда тоғ сувсарининг боласи ваҳшийларча уриб ўлдирилгани ҳақида видеолар тарқалди. Сурхондарё вилояти Экология бошқармаси матбуот хизмати ҳолатга изоҳ берди.
Унга кўра, ҳолат юзасидан бошқарма томонидан ўрганиш ишлари олиб борилмоқда. Ҳозирда вилоят Экология бошқармаси, вилоят Миллий гвардия бошқармаси ҳамда вилоят Ички ишлар бошқармаси томонидан видеода акс этган жойни ва ушбу ишни содир этган фуқароларнинг шахсига аниқлик киритиш ишлари амалга оширилмоқда.
Мазкур ҳолат бўйича олиб борилаётган ўрганишлар якуни бўйича қўшимча ахборот берилади.
Маълумот учун, тоғ сувсари сувсарлар оиласига мансуб, Ўрта Осиё, Европа ва Осиё бўйлаб кенг тарқалган йиртқич сутемизувчи ҳайвондир. Тоғ сувсари кўпинча ўрмонлар, тоғли ҳудудларда яшайди. Уларнинг тана узунлиги 40-50 см, думи 25-30 см атрофида бўлади. Вазни одатда 1,5-2,5 кг ни ташкил қилади. Унинг мўйнаси силлиқ ва зич, асосан қўнғир ва сарғиш тусда бўлади, бўйин қисмидаги оқ доғлари билан ажралиб туради.
Тоғ сувсарлари йиртқич жонивор бўлиб, кичик сутемизувчилар, қушлар, ҳашаротлар ва мевалар билан озиқланади. Қиш ойларида емиш танқис бўлса, инсонлар томонидан ташлаб кетилган озиқ-овқат қолдиқларини ҳам истеъмол қилиши мумкин.
Изоҳ (0)