Жиззах вилоятининг Зомин тумани «Дуоба» қишлоқ фуқаролар йиғини Ўриклисой қишлоғи яқинидаги ўрмон ҳудудларида 1 август куни йирик ёнғин юз берди. Соат тахминан 10:40 да бошланган ёнғин салкам саккиз соатдан сўнг ўчирилди; Фавқулодда вазиятлар вазирлиги (ФВВ) маълумотларига кўра, 80 гектар майдонда қуруқ ўт ва дарахтлар ёнган. Оловни ўчиришга 1600 га яқин одам жалб этилган.
Жумладан, ФВВ дастлаб оловни ўчириш учун 4 та ёнғин-қутқарув бўлинмаси ва фавқулодда вазиятлар бошқармаси шахсий таркибининг 24 нафар вакили йўналтирилгани ҳақида хабар берган эди. Кейинроқ ёнғиннинг тарқалишининг олдини олиш ва уни ўчириш учун ФВВ шахсий таркибининг яна 350 дан ортиқ вакили юборилгани, шунингдек, Миллий гвардия, ИИВ, Экология қўмитаси ва бошқа ташкилотларнинг куч ва воситалари жалб этилгани маълум қилинди.
Шу билан бирга, Мудофаа вазирлиги матбуот хизмати ёнғин сигнали олиниши билан 400 нафар ҳарбий хизматчидан иборат батальон фавқулодда ҳолат ҳудудига бориб, оловни ўчиришга киришганини маълум қилди. Ҳарбий-ҳаво кучларининг тўртта вертолёти эса Зомин сув омборидан 20 дан ортиқ марта сув олиб, аланга ўчоқларига 30 тоннадан ортиқ сув ташлаган. Эътиборга молик томони, шу куннинг ўзида, пешиндан сўнг ҳудудда ёғингарчилик кузатилиб, ёнғинни ўчиришга озми-кўпми ёрдам берган (орадан икки кун ўтиб шу жойда ёнғоқдек дўл ёққани ҳам қизиқ).
Ижтимоий тармоқларда «Дуоба» тарафдаги ўрмонлар 2 август куни ҳам тутаётгани ҳақида видеохабарлар тарқалди, бироқ ФВВ матбуот хизмати ҳудудда ёнғин бўлаётгани ҳақидаги гумонларни рад этди. Жиззах вилояти ФВБ ахборот хизмати раҳбари Фаррух Абдураҳмоновнинг «Янги Давр»га маълум қилишича, «ёнғин асосан инсон омили билан боғлиқ ҳолда юз берган бўлиши мумкин». Чунки, масъулнинг изоҳлашича, ёнғин бошланиши арафасида ўрмонда ҳаво очиқ, ҳарорат Цельсий бўйича 26—28 даража илиқ бўлган, шунингдек, ҳудуддан ўтган электр узатиш линияларида ҳам узилишлар қайд этилмаган. «Ҳозирда ёнғиннинг сабабини ва кўрилган моддий зарарнинг миқдорини аниқлаш бўйича терговолди суриштирув ишлари олиб борилмоқда», — дейди Абдураҳмонов.
Қайд этиш жоиз, Зоминдаги ҳодиса юзлаб ҳарбий хизматчилар ва вертолётлар жалб этилган на биринчи, на ягона ёнғин эмас. Сўнгги йилларда мамлакатнинг ўрмон ҳудудларида бу каби фавқулодда ҳолатлар бир неча юз берган ва бу ҳақда ваколатли органлар ахборот ҳам берган. Таъкидлаш ўринлики, шундай ўрмон ёнғинлари сони бундай ҳодисалар ҳақида берилган ахборотлардан кўпроқ бўлиши мумкин.
2020 йилги ёнғинлар: Юзлаб гектарларни эгаллаган олов, иккита вертолёт, ёниб кетган 600 та ноёб арча
8 февраль куни Тошкент вилояти «Далварзин» давлат ўрмон-ов хўжалигида 455 гектар майдон (шундан 150 гектари ўрмонзор)ни қамраб олган йирик ёнғин содир бўлган. Таъкидланишича, бу ёнғин оқибатида одамлар ва ҳайвонларнинг ҳалок бўлиши ҳолати кузатилмаган.17 июнь куни соат 06:30 да Сурхондарё вилояти Шеробод туманида ҳудудидаги «Сурхон» давлат қўриқхонасида ёнғин бўлаётгани ҳақида хабар келиб тушган. Оловни ўчиришга Мудофаа вазирлигининг 200 нафарга яқин ҳарбий хизматчиси, шунингдек, Сурхондарё ҳокимининг маъқуллаши билан иккита Ми-8 вертолёти жалб этилган. Олов 15:00 да қуршаб олинган, 19:00 га келиб олов ичида қолган 35 гектар майдоннинг 90 фоизида оловни ўчиришга эришилган (вертолётлар умумий 8 соатдан ортиқ учиб, ҳар бири 10 мартадан сув ташлаган). Мудофаа вазирлиги ахборотида Вандоб аҳоли пункти ёнғинда қолиш хавфидан сақлаб қолингани айтилади; Сурхондарё вилоят Фавқулодда вазиятлар вазиятлар бошқармаси маълумотларига кўра, ёнғин оқибатида қўриқхонада ичидаги одамлар ва ёввойи ҳайвонларга зарар етмаган, улар тан жароҳати олмаган.
15 июль куни Тошкент вилояти «Оҳангарон» давлат ўрмон хўжалигида 440 гектардан зиёд ер майдони ёниб кетган. Ҳодиса оқибатида ҳеч ким жабрланмаган, айни вақтда ёнғин сабаблари, бунинг натижасида етказилган зарар миқдори ҳақида маълумот берилмаган.
26 июлга ўтар кечаси, соат 00:47 да Самарқанд вилояти Жомбой тумани ҳудудида жойлашган «Зарафшон» табиат миллий боғининг 2 минг квадрат метр майдонида ёнғин келиб чиққан. Маълумотларга кўра, тўқайзордаги қуруқ ўт ёниб кетган. Ҳодиса оқибатида жабрланганлар бор-йўқлиги ҳақида маълумот берилмаган.
Тошкент вилоятида жойлашган «Оҳангарон» давлат ўрмон хўжалигида 10 август куни яна бир ёнғин кузатилган. Бу сафар олов 5 минг квадрат метр майдонга зарар етказган; ҳодиса оқибатида одамлар ва ҳайвонлар ҳалок бўлиши ҳолатлари қайд этилмаган. Ҳодиса сабаблари очиқланмаган.
12 сентябрь куни Сурхондарё вилояти Шеробод туманидаги бошқа бир ўрмон ҳудуди — «Қизириқ» ўрмон хўжалиги «Гуримбулоқ» тоғ масканида юз берган ёнғин 50 гектарга яқин майдонни эгаллаб олган. Офатга қарши курашга кўплаб махсус техника ва фавқулодда вазиятлар тизимининг ўнлаб шахсий таркиби сафарбар қилинган. Ёнғин сабаблари ва оқибатлари маълум қилинмаган.
30 октябрь куни Қашқадарёдаги «Китоб» давлат ўрмон хўжалигида салкам 12 гектар майдонда ёнғин келиб чиққан. Олов «Денов бола» ўрмон бўлими ходимлари ва шу яқиндаги қишлоқ аҳолиси томонидан ўчирилган. «Китоб» давлат ўрмон хўжалигидан маълум қилишларича, ёнғин фуқаролар томонидан ўт қўйилиши оқибатида келиб чиққан.
Орадан уч кун ўтиб, вилоятнинг Қамаши туманидаги ўрмон хўжалигида ёнғин келиб чиққан, оқибатда 5 гектар майдондаги 600 га яқин Зарафшон арчаси ёниб кетган. Ёнғин сабаби маълум қилинмаган.
2021 йилги ёнғинлар: Ёмғир шарофати билан ўчирилган ёнғин, ярим тунда «қовурилган» малина
Сирдарё вилоятидаги «Қолгансир» ўрмон-ов хўжалигида март ойининг ўзида иккита ёнғин кузатилган. Дастлаб, 4 март куни 1 гектар майдон ёниб кетган. Орадан ярим ой ўтиб, 19 март куни 147,2 гектар майдонда ёнғин содир бўлган — шу ёнғин сабаб «қуёнлар ва қушлар тириклайин ёниб кетаётгани, илонлар аҳолига яқин жойларда кўпайиб кетаётгани» ҳақида гап-сўзлар тарқалган. Энг қизиғи, бу ёнғин шу куни ёққан ёмғир шарофати ўша куннинг ўзида ўчган. Ёнғин сабаблари ва етказилган зарар миқдори эса маълум қилинмаган.24 март куни Қорақалпоғистондаги «Қонликўл» давлат ўрмон хўжалигида юз берган ёнғин оқибатида 1,6 гектар ер майдони зарар кўрган. Ёнғин сабаблари ва оқибатлари маълум қилинмаган.
Жомбой тумани ҳудудидаги «Зарафшон» миллий табиат боғида 3 июль, худди бир йил аввалгидек, ёнғин содир бўлган. Самарқанд вилоят ФВБ матбуот хизмати маълумотига кўра, ёнғин ҳақидаги хабар соат 21:10 да келиб тушган. Ўт ўчирувчилар ҳодиса жойига соат 21:51 да етиб борган, 02:51 да оловни қуршаб олган, 04:03 да ёнғинни ўчирган. Милий боғнинг 1,5 гектар майдонида тўқайзорлар (малина, бутазор, шох-шабба) ёниб кетган; ҳодиса оқибатида жароҳат олганлар йўқ, ёнғин сабаби ва етказилган зарар миқдори маълум қилинмаган.
Изоҳ (0)