O‘zbekistonda o‘rmon fondi yerlari so‘nggi olti yilda 1 million gektarga kengaydi. Bu haqda Oliy Majlis Qonunchilik palatasining navbatdagi majlisida O‘rmon xo‘jaligi agentligi direktori Nizomiddin Bakirov ma’lum qildi.
Majlisda u “O‘rmon fondi yerlaridan samarali foydalanish holati to‘g‘risida”gi axborotni o‘qib eshittirdi. Axborotda bildirilishicha, so‘nggi olti yil davomida o‘rmon fondi yerlari 1 million gektarga kengayib, bugungi kunda 11,9 million gektarni, ya’ni respublika umumiy yer maydonining 26,4 foizini tashkil etadi.
O‘rmon xo‘jaligi agentligi tomonidan 2023-yilda 235 ming gektar maydonda o‘rmon barpo qilish va qayta tiklash tadbirlari bajarilgan, o‘rmon fondi yerlarining foydalanilmayotgan 7 012 gektar maydonlari o‘zlashtirilgan.
Orolbo‘yi hududlarining ekologik barqarorligini ta’minlash maqsadida Qoraqalpog‘iston Respublikasining Mo‘ynoq tumanida 127,8 ming gektar, Buxoro viloyatida 40,6 ming gektar, Navoiy viloyatida 43,7 ming gektar va Xorazm viloyatida 10,6 ming gektar maydonda saksovul va boshqa cho‘l o‘simliklaridan “yashil qoplamalar” barpo etilgan.
Nizomiddin Bakirovning qayd etishicha, “Yashil makon” umummilliy loyihasi doirasida respublika bo‘yicha 3 million tupga yaqin daraxtlar va butalar ko‘chatlari hamda nihollari bepul yetkazib berilgan, 457 gektar maydonda “yashil bog‘lar” barpo etilgan.
Izoh (0)