O‘zbekistonda 2030-yilgacha 1,5 million gektarda o‘rmonlar barpo etish, ularni qayta tiklash rejalashtirilmoqda. Bu haqda “O‘rmon va yashil hududlarni ko‘paytirish, cho‘llanishga qarshi kurashish agentligi faoliyatini tashkil etish chora-tadbirlari to‘g‘risida”gi prezident qarorida belgilandi.
Qarorga ko‘ra, o‘rmon fondi resurslaridan samarali foydalanishning asosiy maqsadli ko‘rsatkichlari etib quyidagilar belgilandi:
- 2030-yilgacha 1,5 million gektarda o‘rmonlar barpo etish, ularni qayta tiklash hamda 3,8 ming gektar o‘rmon fondi yerlarida dorivor va oziq-ovqatbop hamda ziravor o‘simliklar plantatsiyalarini tashkil etish;
- 2030-yilgacha 9,2 ming tonna daraxt va butalar urug‘larini tayyorlash hamda 919 million dona nihol va ko‘chatlarni yetishtirish;
- 2025–2026-yillarda tog‘ va tog‘oldi hududlardagi 500 gektarda “terrasa” usulida daraxt va buta ko‘chatlari ekish.
O‘rmon va yashil hududlarni ko‘paytirish, cho‘llanishga qarshi kurashish agentligi “O‘rmontexnoservis” davlat unitar korxonasi negizida “O‘rmon xo‘jaligini raqamlashtirish markazi” davlat muassasasi tashkil etiladi. Markaz “Aqlli o‘rmon xo‘jaligi” (Smart forestry) axborot platformasining yagona operatori hisoblanadi.
Ushbu markaz o‘rmon resurslarini boshqarish jarayonlarini raqamlashtirish, ularning holatini real vaqt rejimida monitoring qilish, o‘rmon xo‘jaligi sohasi faoliyati zamonaviy texnologiyalar, sun’iy intellekt va integratsiyalashgan axborot tizimlari orqali samarali boshqarilishini ta’minlash bilan shug‘ullanadi.
O‘rmon xo‘jaligi agentligi direktori Nizomiddin Bakirovning 2024-yil boshlarida bergan ma’lumotlariga ko‘ra, O‘zbekistonda so‘nggi olti yil davomida o‘rmon fondi yerlari 1 million gektarga kengayib, 11,9 million gektarni, ya’ni respublika umumiy yer maydonining 26,4 foizini tashkil etdi.
“Yashil makon” umummilliy loyihasi doirasida respublika bo‘yicha 3 million tupga yaqin daraxtlar va butalar ko‘chatlari hamda nihollari bepul yetkazib berilgan, 457 gektar maydonda “yashil bog‘lar” barpo etilgan.
Izoh (0)