Таиландда маймунчечакнинг 1b тури билан касалланишнинг илк ҳолати қайд этилди. Бу ҳақда Nation Thailand хабар берди.
![](/static/2024/08/21/photo_2024-08-21_12-52-09-B_xXv3G4.jpg)
Маълум қилинишича, Африка давлатларида бўлиб қайтган фуқарога касаллик ташхиси қўйилган. Таиландда 2022 йил январидан 2024 йил 11 августигача бўлган даврда маймунчечак билан касалланишнинг 827 та ҳолати қайд этилган бўлиб, уларнинг барчаси 2b тури билан боғлиқ бўлган.
Маймунчечак вирусли касаллик бўлиб, асосан марказий ва ғарбий Африканинг чекка ҳудудларида тропик ўрмонлар яқинида учрайди. Ушбу касалликни ҳайвонлардан одамларга юқтиришнинг биринчи ҳолати 1970 йилда Конго демократик республикасида қайд этилган.
Касаллик қандай симптомларга эга?
Дастлабки симптомлар инфекция юққанидан кейин 5—21-куни пайдо бўлади. Аввалига симптомлар гриппни эслатади ва қуйидагича намоён бўлади:
- юқори ҳарорат;
- бош ва мушаклардаги оғриқлар;
- бел оғриғи;
- катталашган лимфа тугунлари;
- титроқ;
- ҳолдан тойиш;
- 1-5 кундан кейин симптомларга тошма қўшилади. У юздан бошланади ва пастки аъзоларга тарқалади.
Бу сиртдан сувчечакни эслатади: пайдо бўлган қизил доғлар ўрнида тиниқ ёки сарғиш пуфакчалар ҳосил бўлади, улар қурийди, кейин эса тўкилади.
Маймунчечакдан қандай ҳимояланиш мумкин?
Агар саёҳат қилишни режалаштираётган бўлсангиз, эҳтиёт чораларини билишингиз керак:
- Ёввойи дайди ҳайвонлар, хусусан, кемирувчилардан эҳтиёт бўлинг, айниқса, улар чечак тарқалган ҳудудларда яшаса ва носоғлом кўринишга эга бўлса. Уларнинг мурдасига тегманг ва ёввойи ҳайвон гўштини еманг.
- Зарарланган ҳайвон тегиши мумкин бўлган нарсаларга яқинлашманг.
- Умумий чойшаб ва гигиена буюмларидан фойдаланманг ва имкон қадар бемор одамлар билан яқин алоқада бўлманг.
- Гигиена қоидаларига риоя қилинг — қўлларни совунлаб ювинг ёки спиртли дезинфекцияловчи воситалардан фойдаланинг.
- Агар зарарланган одамларни парвариш қилсангиз, шахсий ҳимоя воситаларидан фойдаланинг.
Изоҳ (0)