АҚШда ўрмон ёнғини бутун бошли шаҳарни вайрон қилди (фото ва видео)

АҚШдаги ўрмон ёнғинлари олтин талвасаси даврига оид Гринвилл тарихий шаҳрини вайрон қилди, деб хабар бермоқда Reuters.

Айни пайтда Калифорнияда юз бераётган ва Дикси номи билан машҳур бўлган йирик ўрмон ёнғини Жанубий Каролина штатидаги Гринвилл шаҳрига ёпирилди. Ушбу шаҳарга 150 йил аввал асос солинган, ўшанда унга яқин олтин конлари кўчманчиларни ва савдогарларни Ҳинд водийсига жалб қилган.

Хабарларга кўра, ўт ўчирувчилар ёнғинни тўхтатиш учун бир неча кун давомида тинмай ишлаган, аммо 4 август куни у чизиқни ёриб ўтиб, шаҳар маркази томонга тарқалган.

«Бугун биз Гринвиллни йўқотдик. Ифодалашга сўз ожиз», — деди ушбу ҳудудга вакиллик қилувчи конгрессмен Дуг Ламалф.

Ҳукумат маълум қилишича, Диксидаги уч ҳафталик ёнғин штат тарихида катталиги бўйича саккизинчиси бўлди, айни пайтда аланга 130 минг квадрат акр ҳудудни қамраб олган, 5 август куни эрталабки ҳолатга кўра, ёнғин 35 фоизга тўхтатилган. Ўнлаб иншоотлар, шу жумладан, уйлар ҳам вайрон бўлган.

Тахминан, 800 нафар аҳолидан мажбурий эвакуация қилиш сўралган. Мансабдорлар айтишича, баъзи одамлар кетиш буйруғига бўйсунмаган бўлиши мумкин, аммо қурбонлар ва ярадорлар ҳақида хабарлар келиб тушмаган.

АҚШ ғарбидаги 14 та штатда 100 та йирик ёнғин қайд этилди. Энг оғир вазият Калифорния, Орегон, Монтана ва Айдахо штатларида кузатилмоқда. Одатда ёнғин хавфи йил охирида чўққига чиқадиган Калифорнияда ўтган йилгидан ҳам каттароқ майдон ёниб кетган — ўтган йили эса ёнғин юзасидан тарихдаги энг хавфли мавсум қайд этилган эди.

Айни пайтда аномал иссиқ ҳаво таъсирида дунёнинг бошқа мамлакатларида ҳам ёнғинлар юз бермоқда. Чунончи июлнинг иккинчи ярмида Россиянинг Ёқутистон автоном республикасининг 8 туманида ўрмон ёнғинлар қарийб 1,5 миллион гектар майдонни йўқ қилди.

Туркиядаги ёнғинлар 28 июль куни кучли шамол ва иссиқ об-ҳаво туфайли бошланди. Улар Туркиянинг жанубий вилоятларига таъсир кўрсатди, жумладан, ёнғин ўчоғи Мармарис ва Анталия каби курорт шаҳарлар яқинида жойлашган.

Кейинроқ Исроилда аномал иссиқ иқлим туфайли Қуддус яқинидаги Шореш ҳудудида ёнғинлар кузатилди. Ёнғинлар, тахминан, 10 гектар майдондаги ўрмонлар ҳудудини қоплаб олган.

Куни кеча эса Грециянинг Эвбея ороли ва Афина шаҳри атрофидаги ёнғинлар 200 дан ортиқ уйни бутунлай вайрон қилди ёки зарарлади.

Шунингдек, бундай ёнғинлар Ўзбекистон ҳудудида ҳам кузатилди. Жиззах вилоятининг Зомин тумани «Дуоба» қишлоқ фуқаролар йиғини Ўриклисой қишлоғи яқинидаги ўрмон ҳудудларида 1 август куни йирик ёнғин юз берди. Соат тахминан 10:40 да бошланган ёнғин салкам саккиз соатдан сўнг ўчирилди; Фавқулодда вазиятлар вазирлиги (ФВВ) маълумотларига кўра, 80 гектар майдонда қуруқ ўт ва дарахтлар ёнган. Оловни ўчиришга 1600 га яқин одам жалб этилган.