Исроил ҳукумати ва армияси ўртасида Ғазо жанубида фаластинликлар учун қуриладиган лагернинг нархи ва таъсири туфайли зиддият юзага келди. Сиёсатчилар собиқ бош вазир Эҳуд Олмертни танқид қилди, сабаби у лойиҳанинг амалга ошириш фаластинликлар учун “концентрацион лагер”га айланишини айтганди. Бу ҳақда The Guardian хабар берди.
“Гуманитар шаҳар” деб номланган бу лойиҳа Ғазодаги оташкесим музокараларида баҳсли масалага айланган. Исроил Ғазонинг муҳим ҳудудларида, жумладан Рафаҳ харобаларида ўз аскарларини қолдиришни истамоқда. Мудофаа вазири Исроил Кацнинг айтишича, айнан ўша ерда 600 кишилик лагер қурилади. Эҳуд Олмерт эса мазкур лагерга фаластинликларни мажбуран кўчириш “этник тозалаш” ҳисобланишини айтган.
Исроил аллақачон Ғазо ва Ғарбий Соҳилда ҳарбий жиноятлар содир этмоқда, лагер қурилиши эса вазиятни янада кескинлаштиради. Бу конслагер бўлади. Афсуски, шундай. Агар фаластинликлар янги “гуманитар шаҳар”га мажбуран кўчирилса, буни этник тозалашнинг бир қисми дейиш мумкин. Бу ҳали содир бўлгани йўқ, деган Исроил собиқ бош вазири Олмерт.
ҲАМАСнинг юқори мартабали аъзоси Ҳусом Бадроннинг айтишича, лагер қуриш режаси музокараларни мураккаблаштириш учун “қасддан қилинган тўсқин” ҳисобланади.
Бу ажратилган, изоляцияланган шаҳарчага айланади, геттога ўхшайди. Буни мутлақо қабул қилиб бўлмайди ва ҳеч бир фаластинлик бунга рози бўлмайди, деган у.
Кацнинг айтишича, аввалига 600 минг киши, кейинчалик эса Ғазонинг бутун аҳолиси лагерга кўчирилади. Режа бош вазир Биньямин Нетаньяху томонидан қўллаб-қувватланган. 2006–2009 йилларда бош вазир бўлган Эҳуд Олмерт лойиҳани очиқчасига танқид қилган сиёсатчилардан бири бўлди.
Исроил мерос вазири Амичаи Элияҳу танқидлар сабабли Олмертни қамоққа олишга чақирди. У бу фикрни айтаётиб, Олмерт илгари коррупция учун қамоқда бўлганини ҳам эслатиб ўтди.
Олмерт қамоқхонани жуда яхши билади. Уни бутун дунё бўйлаб тарқатаётган нафрат ва антисемитизмдан тўхтатишнинг бошқа йўли йўқ, деган Элияҳу.
Исроил ҳарбийлари ҳам лагер қурилиши тарафдори эмас. Улар режа бўйича ҳужжат тайёрлаш буйруғини олган. Исроил армияси бош штаби раҳбари Эел Замир ва бош вазир Нетаньяху ўртасида лагер юзасидан кескин тортишув бўлган.
Замирнинг айтишича, лойиҳа ҳарбий кучлардан маблағ ва бошқа ресурсларни олиб қўйиб, уларнинг жанг қилиш қобилиятини пасайтиради ҳамда гаровга олинганларни қутқаришга халақит беради. Унинг идораси илгари тинч аҳолини кўчириш ва “тўплаш” урушнинг мақсади эмаслигини таъкидлаганди.
Нетаньяху эса Замирга кескин жавоб қайтарган ва у томонидан тақдим этилган режа қурилиш ишларининг бир йилгача чўзилиши ва қимматга тушишига олиб келишини айтган
Мен ҳақиқий, бажариладиган режа сўрагандим, деган бош вазир ва лагерни қуриш учун арзонроқ ва тезроқ вариантни 15 июлгача тайёрлашни талаб қилган.
Исроил Молия вазирлиги ҳам “гуманитар шаҳар” лойиҳасига эътирозлар билдирган. Лойиҳанинг йиллик харажати 15 миллиард шекел (тахминан 4,05 миллиард доллар) туради ва бу давлат бюджетига оғир юк бўлади. Натижада бу харажат исроиллик солиқ тўловчилар зиммасига тушади. Бу мактаблар, шифохоналар ва ижтимоий ёрдам дастурларига пул ажратишнинг камайишига олиб келиши мумкин.
Изоҳ (0)