Францияда 14 июль — Бастилия қалъасини забт этиш куни муносабати билан Париждаги Эйфель минораси атрофида ёрқин дрон ва мушакбозлик шоуси бўлиб ўтди. Шу куни бутун мамлакат бўйлаб турли байрам тадбирлари ўтказилди.
Бастилия қалъаси эгалланган кун Францияда миллий байрам сифатида кенг нишонланади. Бу сана 1789 йилда қироллик қамоқхонаси бўлган Бастилия қалъасининг босиб олиниши билан боғлиқ бўлиб, Француз инқилобининг бошланиши сифатида тарихга кирган. Мазкур воқеа мамлакатда монархия тугатилиб, республика тизимининг шаклланишига йўл очган эди.
Ҳар йили минглаб парижликлар ва сайёҳлар пойтахтнинг Марс майдонига оқиб келади. Бу йилги байрам томошалари эса ўзгача тус олди. Париж осмонида илк бор 1000 дан ортиқ дрон иштирокида катта технологик ёруғлик шоуси намойиш этилди.
Улар турли шакллар, белгилар ва сўзларни ҳосил қилар экан, томошабинларга Франция Республикаси шиорини — “Liberté, Égalité, Fraternité” (Озодлик, Тенглик, Бирдамлик) эслатди.
Эйфель минораси эса махсус ёритиш технологиялари билан безатилди. Минора бўйлаб 120 та чақнаб турувчи нуқталар ўрнатилган бўлиб, бу томошага янада сеҳрли тус бағишлади. Шунингдек, Марс ва Трокадеро майдонларида махсус кузатув платформалари ўрнатилиб, меҳмонлар байрамни янада қулай шароитда томоша қилиш имконига эга бўлишди.
Байрам тадбирлари Франциянинг бошқа шаҳарларида ҳам давом этди. Марсель, Лион, Ницца каби йирик шаҳарларда ҳам мушакбозлик, концертлар, параддан иборат дастурлар ўтказилди. Баъзи жойларда эса ҳарбий техника кўргазмалари ҳам ташкил этилди.
Изоҳ (0)