Баъзан фильм ёки сериалнинг биргина кадри узоқ вақт хотирамизда сақланиб қолади — бу фақат кучли саҳна ёки ёрқин реплика туфайли эмас, балки воқеа содир бўлган жой туфайли ҳам.
“Тахтлар ўйини”
Шимолий Ирландиядаги Уорд қалъасини киночилар Вестерос тарихининг бошланиш нуқтаси бўлган Старклар қироллик хонадонининг қароргоҳи ва авлодлар маскани қалъасига айлантирган. Аслида бу қалъа Даун графлигида, Странгфорд-Лох кўрфази яқинида жойлашган.
Сан-Хуан-де-Гастелугаче — сериалда Таргариенлар сулоласининг ватанига айланган ҳақиқий жой. Бу Испания қирғоқлари яқинидаги қояли орол бўлиб, қуруқлик билан кўприк орқали туташган. Сериалда айнан шу ерга Деенерис Таргариен Вестерос ерларига илк бор қадам қўяди.
“Андиша ва ғурур”
Англиядаги Уилцҳир графлигида жойлашган Staurhead боғларидаги Аполлон ибодатхонаси “Андиша ва ғурур” (2005) фильмида жаноб Дарсининг Элизабет Беннетдан биринчи бор қўлини сўраш саҳнаси учун суратга олиш жойи сифатида хизмат қилган. Шиддатли ёмғир остида тасвирга олинган бу саҳна фильмдаги энг эсда қоларли лавҳалардан бирига айланган.
“Жокер”
Жокер зинапояси Нью Йорк шаҳридаги Бронкс туманида, Шекспир хиёбони билан Андерсон хиёбони оралиғида жойлашган. Айнан шу ерда Хоакин Феникс гавдалантирган Артур Флек образи ўзининг машҳур рақсини ижро этган саҳна суратга олинган. Бу саҳнада у ёрқин кийимда Гери Глиттернинг Rock and Roll Part 2 қўшиғи остида рақсга тушади. Бу лавҳа фильмнинг энг эсда қоларли лаҳзаларидан бирига айланди. Фильм экранларга чиққандан сўнг, бу жой сайёҳлар ва фильм мухлислар эътиборига тушди.
“Дюна”
Италиянинг Сан-Вито-д’Алтиволе шаҳрида жойлашган Брион ёдгорлиги “Дюна: Иккинчи қисм” (2024) фильмининг асосий жойларидан бирига айланди. У Кайтейн сайёрасини — Империум пойтахти ҳамда император Шаддам IV ва малика Ируланнинг қароргоҳи сифатида тасвирланди. 1968—1978 йилларда Карло Скарпа томонидан лойиҳалаштирилган бу меъморий дурдонадан суратга олиш жойи сифатида фойдаланиш Брион оиласининг махсус рухсати билан амалга оширилди. Илгари киноижодкорларнинг бундай барча сўровлари рад этилган эди. Бироқ Фрэнк Гербертнинг романи ва фильмнинг биринчи қисмининг мухлиси бўлган оила аъзоларидан бири лойиҳа ҳақида билиб қолгач, суратга олиш учун рухсат беришга рози бўлди.
“Interstellar”
Исландиядаги Ватнаёкюдл миллий боғида жойлашган Свинафетлсёкулл музлиги Кристофер Нолан фильмида доктор Манннинг муз сайёрасига айланди — бу “Эндюренс” жамоаси ташриф буюрадиган шафқатсиз, зулматли дунё. Свинафетлсёкулл ўзининг ғаройиб музли релефи ва жонсиз манзаралари билан ҳаёт излари бўлмаган узоқ сайёра муҳитини ажойиб тарзда ифодалади.
“Оқ нилуфар”
Таорминадаги San Domenicо Palace меҳмонхонаси HBO телеканалининг “Оқ нилуфар” сериалининг иккинчи мавсумида асосий жой сифатида тасвирланган. Иония денгизига қараган қояда жойлашган бу ҳашаматли беш юлдузли меҳмонхона дастлаб XV аср монастири бўлган ва 1896 йилда меҳмонхонага айлантирилган. Сериалда меҳмонхона бош қаҳрамонлар бошидан кечираётган драматик воқеалар учун фон вазифасини ўтайди. Гарчи сериалдаги пляж саҳналари меҳмонхона яқинида тасвирланган бўлса-да, аслида улар Таорминадан тахминан 2,5 соатлик масофада жойлашган Чефалу пляжида суратга олинган.
“Бриджертонлар”
Англиядаги Бат шаҳрида жойлашган нафис Georgian услубидаги Бофорт майдони икки қаватли турар жойлар ва марказий майсазор сериалнинг турли саҳналари, жумладан қаҳрамонларнинг сайр қилиш эпизодлари учун фойдаланилган. Мисол учун, биринчи мавсумда бу ерда Пенелопа ва Элоиза оқсочнинг ҳомиладорлиги ҳақида суҳбатлашаётган саҳна суратга олинган. 1730 йилда барпо этилган майдон Бат шаҳрининг Қироллик театри биноси яқинида жойлашган бўлиб, ўзининг XVIII асрга хос нафис меъморчилиги билан ажралиб туради. Бу эса Лондон кўчаларини тасвирлаш учун ажойиб фон вазифасини ўтаган.
“Брижит Жонс”
Лондондаги Темпл туманининг Миддл-Темпл-Лейн тор кўчаси Брижит Жонс ҳақидаги фильмлар туркуми мухлислари учун рамзий жойга айланган. Айнан шу кўча Марк Дарси ишлайдиган идорага олиб боради.
Изоҳ (0)