Қирғизистонда бўлиш қоидаларини бузган шахсларни мамлакатга 1-5 йилгача киритмаслик бўйича қонун ишлаб чиқилади. Бу ҳақда Қирғизистон Вазирлар Маҳкамаси раиси ўринбосари — Миллий хавфсизлик қўмитаси раҳбари Қамчибек Ташиев 8 июль куни Ўш вилоятига қилган ташрифи чоғида маълум қилинди, дея хабар бермоқда “Телеканал регион”.
Қамчибек Ташиев “Дўстлик” божхона-постида кириб чиқувчилар сони ва миграция тартиби бўйича қизиқди. Айтилишича, мазкур постдан кунига 20 мингга яқин шахс ўтиб-қайтади. Эрталаб асосий оқим Ўзбекистондан Қирғизистонга бўлади. Асосан ўзбекистонликлар иш, саёҳат мақсадида ва меҳмонга Қирғизистонга боради.
Тартибга кўра, Ўзбекистон фуқаролари 60 кун Қирғизистонда визасиз юриши мумкин. Бунинг учун 5 иш кунида яшаш жойи бўйича рўйхатга туриши талаб этилади.
Ноқонуний миграция бўйича ишланглар. Шуларнинг барчасини текширинглар. Майли кирсин, Ўзбекистон бизни қўшнимиз, улар билан яхши, туғишганлардек муомалада бўлишимиз керак. Бироқ буларнинг барчаси қонунчилик асосида бўлиши керак, деди Қирғизистон Миллий хавфсизлик қўмитаси раҳбари.
Маълумот беришларича, “Дўстлик” божхона-постида кунига 10-15 та ҳолатда Қирғизистонда бўлиш тартибини бузган ўзбекистонлик фуқаролар жазога тортилади. Ҳуқуқбузар 60 кундан кейин яна мамлакатга қайтиб кириши мумкин.
Қонунни бузиб, муддатини ўтказиб мамлакатдан чиқиб кетаётганларни қайтиб киргизмаслик керак. Шундай тартиб ишлаб чиқинглар. Шундай қилмасак, бугун жаримани тўлаб қўйиб, эртага яна кираверади. Ундайларга, мисол учун, 1-5 йилгача киришга тақиқ қўйиш керак. Шундагина озаяди, деди Қамчибек Ташиев.
Ташиевнинг тушунтиришича, ҳуқуқбузар яна қайтиб Қирғизистонга кирмоқчи бўлганида, “Виза тартибини бузганингиз учун сизга 1 ёки 3 йилга Қирғизистонга кириш тақиқланган”, деб жавоб берилади.
Аввалроқ Қамчибек Ташиев “Дўстлик” постида Қирғизистон ва Ўзбекистон ўртасидаги “Дўстлик” чегара божхона постида коррупциянинг олдини олиш бўйича топшириқ бергани хабар қилинган эди.
Изоҳ (0)