Буюк Британиялик 21 ёшли Зара Лахлан Гиннес рекордлари китобига киритилди. У Европадан Жанубий Америкага қайиқда ёлғиз ўзи Атлантика океанини кесиб ўтган биринчи аёл бўлди.
Қиз Португалиянинг Лагуш шаҳридан йўлга чиқиб, Француз Гвианасининг Каенна шаҳрига етиб келди. У 97 кун ичида 7026 километр масофани босиб ўтди. Бу ҳақда Гиннес рекордлари китоби расмий сайтида маълум қилинган.
Бунга қадар Зара катта синовга тайёргарлик кўриб, беш йил давомида эшкак эшиш билан жиддий шуғулланган.
Саёҳат пайтида Зара кунига 17 соат эшкак эшди. Каеннага етиб келгач, у учта рекордни ўрнатди: Атлантика океанини Европадан Жанубий Америкага кесиб ўтган биринчи аёл, бу йўналишнинг энг ёш иштирокчиси ва уни ҳеч қандай ёрдамсиз босиб ўтган биринчи аёл сифатида тан олинди.
Сузиш жуда машаққатли кечди. Қиз галлюцинацияларга дуч келди, уни бир неча бор барракудалар тишлаб олди, қайиғи ортидан акула эргашди ва бир куни у косаткалар тўдасини кўриб қолди. Аммо шунда ҳам у таслим бўлмади ва мақсадига эришди.
Изоҳ (0)