Сценарийнавис Боб Гейл билан ҳамкорликда “Келажакка қайтиб” фильмини суратга олган режиссёр Роберт Земекисни ХХ аср башоратчиси десак адашмаймиз. Ушбу франшизанинг биринчи қисми 1985 йилда — 40 йил олдин — экранларга чиқди ва унда режиссёр янги техник кашфиётлар дунёсини намойиш этди. Улардан қайсилари амалга ошгани ва қайсилари ҳозирча кинематограф даҳосининг хаёлоти бўлиб қолаётганини қуйида билиб оласиз.
Видео чатлар
Одамлар уй телефонлари кенг тарқалган пайтдан бошлаб, яқин атрофда бўлмаган киши билан мулоқот қилиш, шу билан бирга реал вақтда овозини эшитиш ва тасвирини кўриш ҳақида орзу қила бошлаган. Роберт Земекис ҳам ўз фильмида видеочатларнинг версиясини тақдим этиб, деярли аниқ башорат қилган. Фильмдан олинган кадрда Марти ва Ниддлз Zoom орқали суҳбатлашаётгандек кўринади, аммо сюжетга кўра, улар буни интернет орқали эмас, балки телефон кабели ёрдамида амалга оширади. Бу кадрда телевизор ҳам эътиборга лойиқ: ясси, рангли, катта экранли — бундай телевизорлар 1985 йилда умуман бўлмаган.
Дронлар
Франшизанинг иккинчи қисмида Марти келажак дунёсида итларни эгалари эмас, балки дронлар сайр қилдираётганини кўриб ҳайратга тушади. Гарчи ҳозирги кунда бундай дронлар асосан видеотасвирга олиш учун ишлатилса-да, айрим ишқибозлар уларни Земекис башорат қилгандек мақсадларда ҳам қўлламоқда. Карантин пайтида баъзи одамлар чиндан ҳам итларининг арқонларини дронларга боғлаб, итларини ташқарига чиқариб юборган ва камералар орқали уй ҳайвонларини кузатиб турган. Кўпчилик учун ҳайвонлар билан сайр қилиш карантинда кўчага чиқишнинг ягона қонуний йўли бўлса-да, бу усул ҳам кенг тарқалиб, касаллик юқиш хавфини иложи борича камайтиришга ёрдам берди.
Учар скейтборд
“Келажакка қайтиб” фильмидаги учар скейтборд 2023 йилда ҳақиқатга айланди, бироқ баъзи чекловлар билан. Ҳозирча бундай скейтбордларни оммавий ишлаб чиқариш ҳақида гап йўқ, аммо янги технологиянинг лаборатория синовлари жуда муваффақиятли ўтмоқда. Агар унга кучли магнитлар ўрнатилса, у фақат металл юзаси устида уча олади. Шу сабабли тортишишни кучли ҳаво оқимлари ёрдамида ҳосил қилишга уринишмоқда.
Ақлли кроссовкалар
2011 йилда Марти Макфлайнинг ўз боғланадиган Nike Маг кроссовкалари ҳам ҳақиқатга айланди. Ихтиро учун патент топширилганидан то биринчи жуфт ишлаб чиқарилгунига қадар 3 йил ўтди ва моделнинг бошланғич нархи тахминан 350 долларни ташкил этди. Кроссовкалар чекланган миқдорда ишлаб чиқарилгани сабабли Nike улардан жами 5 миллион доллар атрофида даромад олди, холос. эБай каби сайтларда Nike Маг ҳозир ҳам сотувда учрайди, бироқ уларнинг нархи аллақачон 20 минг долларга етиб бўлди. 1985 йилда бундай юқори технологияли пойабзални деярли ҳар бир ўсмир орзу қиларди, аммо ҳозир Nike Маг ўтмишда қолиб кетган. Улар аллақачон ишлаб чиқаришдан олиб ташланган, ипларни бошқарадиган смартфон иловаси эса эскириб, ишлаб чиқувчилар томонидан янгиланмаяпти.
Планшетлар
Роберт Земекиснинг башоратига кўра, келажакда барча инсонлар нақд пулдан воз кечиб, пул ўтказиш учун фақат махсус қурилмалардан фойдаланишади. Бу масалада режиссёр деярли ҳақ бўлиб чиқди, бироқ хавфсизлик жиҳатларини тўлиқ ҳисобга олмаган. Баъзи саҳналарда Марти Макфлай такси ҳақини электрон қурилмага бармоғини теккизиш орқали тўлайди ва худди шу усулда уйсиз одамга садақа беради. Қурилмаларнинг ўзи замонавий планшетларга ўхшайди, аммо фақат бармоқ изи билан пул ўтказиш ҳозирча имконсиз.
Бионик протез
Марти 2015 йилги газетада машҳур бейсболчининг бионик протезли қўли билан тўп отгани учун ўйиндан четлатилгани ҳақида ўқийди. Бундай технологиялар спортга кириб келмаган ва уларни, шубҳасиз, допинг деб ҳисоблашган бўларди. Бироқ фақат фикр кучи билан бошқариладиган протезларнинг ўзи бугунги кунда воқеликка айланди. Уларни биринчи марта 2014 йилда оммавий равишда қўллаш бошланган ва Земекис сана борасида деярли тўғри тахмин қилган. Ҳозирда протезлар имконияти чекланган инсонларга фаолроқ ҳаёт кечиришга ёрдам бермоқда ва тўлақонли оёқ-қўл ўрнини босувчи восита сифатида қаралмоқда.
Голограммалар
Келажак дунёсида “Жағлар” фильмининг навбатдаги қисмини улкан акула, аниқроғи, унинг голограммаси реклама қилади. 3D эффектли баннерлар маркетинг соҳасида анчадан бери қўлланиб келинмоқда, бироқ улар ҳозирча унча таъсирчан кўринмаяпти. Бу саҳнада режиссёр айнан голограммаларнинг пайдо бўлишини башорат қилгани ҳақида фикрлар бор, аммо кўпчилик яна бир тенденцияни қайд этади. Гап шундаки, афишада Марти “Жағлар” фильмининг 19-қисмини кўради. Ҳозирги кинематографияда кузатилаётган жараёнлар эса айнан давомий фильмлар даври деб аталмоқда. Оригинал сценарийлар тобора камроқ суратга олинмоқда, режиссёрлар эса кўпинча классик асарларни қайта талқин қилиш билан шуғулланмоқда.
Ақлли кўзойнак
2015 йилда Марти Макфлай болалари виртуал реаллик кўзойнаги орқали телевизор кўришади ва бу технология ҳозирги кунда жадал ривожланмоқда. Бу ақлли аксессуар ёрдамида энди компьютер ўйинларини ўйнаш, саёҳат қилиш ва ҳатто спорт билан шуғулланиш мумкин. Баъзи кўзойнаклар камералар билан жиҳозланган бўлиб, улар биринчи шахс нуқтайи назаридан видео ёзиб олиш имконини беради. Ваҳоланки, бундан йигирма йил олдин кинотеатрлар учун биринчи 3D — бир линзаси кўк, иккинчиси қизил рангли кўзойнаклар ҳақиқий мўжизадек туюлган эди.
Изоҳ (0)