Франция президенти Эммануэль Макрон келгуси икки йил ичида ҳарбий харажатларни 6,5 миллиард еврога оширишга ваъда берди. У Россия томонидан бўлаётган таҳдидлар бунга сабаб бўлаётганини айтди. Бу ҳақда Financial Times хабар берди.
Макроннинг сўзларига кўра, 2026 йилги мудофаа бюджети 3,5 миллиард еврога, 2027 йилда эса яна 3 миллиард еврога ошади. Бу аввалроқ режалаштирилган 110 миллиард евродан тахминан 6 фоизга ўсишни англатади.
1945 йилдан буён эркинлик ҳеч қачон бу даражада жиддий таҳдид остида бўлмаган. Бу дунёда озод бўлиш учун — биздан қўрқишлари керак. Бунинг учун кучли бўлишимиз керак, деган Франция президенти.
2026 йилги бюджет режасида мудофаа соҳаси қўшимча маблағ оладиган ягона йўналиш бўлиши кутилмоқда. Франция ҳукумати бюджет тақчиллигини камайтириш мақсадида харажатларни қисқартириш ва солиқларни ошириш орқали 40 миллиард еврогача молиявий чораларни ишлаб чиқмоқда.
Европа давлатлари ўз мудофаа салоҳиятини мустаҳкамлашга кўпроқ эътибор қаратмоқда. Бу АҚШ президенти Дональд Трампнинг Европа ўз хавфсизлигини ўзи таъминлаши керак деган талабидан сўнг янада кучайди.
Шу сабабли, июнь ойида НАТО давлатлари ўртасида мудофаа харажатларини ялпи ички маҳсулотнинг 3,5 фоизигача ошириш бўйича тарихий келишувга эришилди. Бу кўрсаткич НАТОга аъзо 32 давлатнинг қарийб учдан икки қисмида, жумладан Францияда ҳам, ҳозирда қўлланилаётган анъанавий 2 фоизлик мақсаддан анча юқори.
Макрон Европа Иттифоқи минтақавий мудофаани кучайтириш учун иттифоқ бўйича биргаликда қарз олиш механизмини йўлга қўйиш зарурлигини илгари сурмоқда. Бироқ Германия бу ташаббусга қарши чиқмоқда. Бунинг ўрнига, мамлакатнинг ўзи қўшимча қарз олиш йўли билан мудофаа харажатларини молиялаштиришни бошлади.
Евростат маълумотларига кўра, 2024 йил охирига келиб, Германияда давлат қарзининг ЯИМга нисбати 62,5 фоизни ташкил этган; Францияда эса бу кўрсаткич 113 фоизга етган, бу билан у фақат Греция ва Италиядан ортда қолмоқда.
Изоҳ (0)