Тошкент шаҳрида ДХХ ва Божхона идоралари ҳамкорлигида кучли таъсир қилувчи дори воситаларининг ноқонуний айланмасига қарши курашиш доирасида бир киши қўлга олинди.
Тошкент вилоятининг Оҳангарон шаҳрида истиқомат қилувчи, 1992 йилда туғилган шахснинг Янгиҳаёт туманидаги ижарадаги яшаш хонадони холислар иштирокида кўздан кечирилганда, келгусида сотиш мақсадида сақлаб келинаётган 16 249 дона “Зардекс” кучли таъсир қилувчи дори воситалари борлиги аниқланиб, ашёвий далил сифатида олиб қўйилган.
Маълум бўлишича, у муқаддам Telegram орқали савдо қилувчи шахс томонидан Сергели тумани ҳудудидаги хуфия жойга қолдириб кетилган ушбу дори воситаларини олиб, келгусида мижозларга сотганидан сўнг, наркосавдогарга 16 минг АҚШ доллари бериши керак бўлган.
“Зардекс” дори воситалари таркибида прегабалин моддаси мавжуд бўлиб, Вазирлар Маҳкамасининг 2019 йилдаги қарорига мувофиқ, у кучли таъсир қилувчи моддалар туркумига киради.
Ҳозирда дорифуруш фуқарога нисбатан Жиноят кодексининг 251-1-моддаси (кучли таъсир қилувчи ёки заҳарли моддаларни қонунга хилоф равишда эгаллаш) 5-қисми билан жиноят иши қўзғатилиб, қамоқ эҳтиёт чораси қўлланди.
Қонунчиликка кўра, кўп миқдорда кучли таъсир қилувчи ёки заҳарли моддаларни қонунга хилоф равишда эгаллаш 10 йилдан 20 йилгача озодликдан маҳрум қилиш билан жазоланади. Айни пайтда тергов ҳаракати олиб борилмоқда.
2025 йилнинг биринчи ярмида божхонада 1247 кило гиёҳвандлик воситалари, 156 кило психотроп ва кучли таъсир этувчи моддалар тўхтатиб қолинган.
Изоҳ (0)