Буюк Британия ва Франция Украина денгиз ҳамда ҳаво ҳудудини биргаликда назорат қилиш учун қўшма коалиция тузди. Бу Россия ўт очишни тўхтатиш режасига рози бўлган тақдирда амалга ошади.
Буюк Британия бош вазири Кир Стармер ва Франция президенти Эммануэл Макрон “Украина кўп миллатли кучлари” коалицияси тузилганини эълон қилган. Ушбу ташаббус доирасида икки давлат украиналик ҳарбийларни ўқитиш билан шуғулланади. Режага кўра, коалиция штаб-квартираси дастлаб Парижда жойлашади, кейинчалик Лондонга кўчирилади.
Ўн минглаб европалик ҳарбийлардан иборат контингент Украина шаҳарлари ва муҳим инфратузилма объектлари, жумладан, атом электростанцияларини ҳимоялаш учун ягона тузилмага — “Ирода коалицияси”га бирлашади. Ушбу режа дастлаб НАТО билан низо келтириб чиқариши эҳтимоли сабаб барбод бўлган эди.
Украина чегараларини ҳимоялаш ташаббуси Буюк Британия мудофаа вазири Жон Ҳилининг шу ҳафта берган баёнотига зид келади. Унда икки давлат Украинани қўллаб-қувватлаш учун ҳарбий кучларни қандай таъминлаши баён этилганди. Режа бўйича, британиялик аскарлар Украинага юборилиши лозим эди.
Times радиоси журналистлари Ҳилидан “Бу режада ҳали ҳам Украинага қўшин юбориш назарда тутилганми?”, деб сўради. Ҳили эса, “Ҳа. Бош вазир ҳар доим ўт очишни тўхтатиш учун Украинага қўшин киритишга тайёр”, дея жавоб қайтарди.
Эммануэл Макрон билан Кир Стармер коалиция борасида хабар бериш учун матбуот анжумани уюштирган.
Биз ҳозиргина илк бора АҚШ вакилларини ўз ичига олган “Ирода коалицияси” йиғилишига ҳамраислик қилдик. Штаб-квартираси Парижда жойлашган “Украина кўп миллатли кучлари” режаси эълон қилинди. Биз тинчлик битимини қўллаб-қувватлашга тайёрмиз. Путин тинчликдан юз ўгираётган бир пайтда, биз украин халқини ҳимоя қилиш ва Путинни ўт очишни тўхтатишга кўндириш учун Украинани кўпроқ қўллаяпмиз, деган Стармер.
Тинчлик сулҳига эришилгач, Буюк Британия ва Франция бошчилигидаги коалиция Украина қуролли кучларини тиклашга ёрдам бериш учун Киевга ҳарбий инструкторлар ва логистика мутахассисларини юборишни режалаштирган. Коалиция самолётлари Украина ҳаво кучлари билан ҳамкорликда мамлакат ҳаво ҳудудини қўриқлаб, тижорий парвозларни қайта йўлга қўяди.
Қора денгизда эса Туркия, Болгария ва Руминия бошчилигидаги ҳарбий-денгиз кучлари мамлакатни миналардан тозалаб, Украина портларига юк ташиш йўлларини ҳимоя қилади. Аммо Макрон “Франция-Британия” коалицияси Украинага юборилган бошқа Европа қўшинларини ҳимоя қилмаслигини билдирган.
Изоҳ (0)